HINDI SUMIPOT SI Maricel Soriano sa ipinatawag na hearing ng Brgy. Poblacion ng Makati kaugnay sa kaso nito sa dalawa niyang kasambahay na inakusahan siya nang pananakit at pagmumura.
Dinagsa nga ito ng media dahil ang buong akala nila ay darating si Maricel, pero dedma lang siya at wala man lang pinapuntang representative o nagpasabi man lang na ‘di ito makakarating.
Nakakatawa nga ang dalawang kasambahay nito na sina May Chachuela at Camille Acojedo, dahil parang nanibago yata sa dami ng mga reporters na nagkagulo sa kanila. Natatawa sila nang bumaba ng kotse hanggang sa nakapasok sila ng barangay hall.
Halos isang oras din silang naghintay kay Maricel pero wala talaga, kaya bumalik na lang sila sa tanggapan ni Mon Tulfo sa Radyo Inquirer.
Ang sabi nu’ng dalawang kasambahay niya, nu’ng July 1 ay tumawag daw sa kanila itong si Inday Castillo para pakiusapan na pag-usapan na lang daw nila ‘yun at ayusin. Pero ang gusto nilang dalawa ay makaharap daw si Maricel para humingi sa kanila ng patawad. Hindi raw sila magpapaareglo sa pera. Ang gusto lang daw nila ay mabigyan sila ng hustisya. Kung hindi raw sila haharapin ni Maricel, paabutin na nila ito sa korte.
Sa July 13 ang susunod ni-lang hearing sa barangay na yun. Kung hindi pa rin sisipot si Maricel, bibigyan pa siya ng isa pang hearing. Pero kung wala pa rin, ipapasa na raw ito sa piskalya.
Si Mon Tulfo ang nagbibigay ngayon ng proteksiyon sa dalawang kasambahay na nagreklamo. Ipinaparating din niya kay Maricel na puwede raw siyang mamagitan para magkaayos sila. Puwede raw itong pumunta sa kanyang Radyo Inquirer anytime para pagharapin sila ng dalawa nitong kasambahay.
Hindi naman ito puwedeng dedmahin lang ni Maricel. Dapat may gagawin na siya rito at harapin niya ito, dahil pursigido ang dalawa na ituloy ang kaso kung hindi sila haharapin ng aktres.
SA SUSUNOD NA linggo na raw ang dating nina Heart Evangelista at Daniel Matsunaga galing sa ilang linggong bakasyon nito sa Brazil. Nakahanda raw itong magsalita tungkol sa isyu nila ni Marian Rivera.
Naku naman! Nagsu-showing na ang Temptation Island at malakas naman sa takilya.
Siguro tapusin na iyan at manahimik na dahil nasa iisang network naman sila. Tingin ko naman diyan, magkakaayos din sila kaya manahimik na lang sila.
Sa Twitter lang nag-e-emote si Heart at ang ending tuloy, na-hack ito at kung anu-anong mga pinagsasabi laban kay Marian. Hindi naman kapani-paniwalang si Heart ang nagpu-post nu’n sa Twitter niya kaya hindi na ito pinatulan. Ang dinig ko, natunton din daw ang hacker na ‘yun, kaya tumigil na rin.
Pansamantalang sa Twitter account muna ni Daniel nagtu-tweet si Heart, na ewan ko ba bakit sila tweet nang tweet! Sana manahimik na lang at i-enjoy ang bakasyon niya sa Brazil, ‘di ba?
Mga Mata ni Lolita
by Lolit Solis
