NANG PUMIRMA NG kontrata si Shamcey Supsup sa ABS-CBN, may naka-line-up agad na show na ibibigay sa kanya ang Kapamilya Network. Maugong ang balita na ang Ms. Universe 3rd runner-up ang kapalit ni Mariel Rodriguez bilang co-host ni Toni Gonzaga sa pagbubukas ng Pinoy Big Brother. Malaki ang paniniwala ng mga bigwigs ng Dos na lalong tataas ang rating ng nasabing reality show sa tulong ni Shamcey. Bukod sa taglay nitong karisma, matalino at magaling magsalita.
Ayon sa aming source, bonggacious nga raw ang offer ng Kapamilya Network kay Shamcey, kaya happy ito. Bukod sa PBB, may follow-up project ang dating beauty queen na ayaw munang ipa-banggit. May nagsa-sabing magiging co-host siya sa noontime show nina Randy Santiago, John Estrada at Rico Puno pagkatapos ng PBB. May tsika ring ipapasok siya sa The Buzz ni Boy Abunda.
SPEAKING OF MARIEL Rodriguez, puring-puri siya ni Cristy Fermin bi-lang co-host nina Shalani Soledad at Willie Revillame sa Wil Time Bigtime. “Bilib ako sa babaeng ‘yun, bukod sa maganda na, magaling pang maki-sama sa mga katrabaho niya sa show. Magaling mag-host, laging nasa highest level, bigay na bigay pero hindi nananapaw. Inaalalayan niya si Shalani, nakikiramdam,” papuring sabi ng TV host-columnist.
Pinabulaanan ni Cristy ang balita na pitong katao raw ang malubhang nasaktan na ngayon ay nasa ICU para lang makakuha ng ticket sa first anniversary ng Wil Time Bigtime na gaganapin sa Araneta Coliseum sa darating na Sabado. Kung saan-saang probinsiya pa nanggaling ang ating mga kababayan para lang magbakasakaling manalo sila ng house & lot na ipamimigay sa araw na ‘yun para sa mahihirap. “Pati nga sa “Obra ni Nanay”, madaling-araw pa lang, ang daming taong nasa labas at hinihintay ang pagdating ko para humihingi ng ticket,” say ni Cristy.
MAY TSIKANG LILIPAT na rin si Martin Nievera sa Kapatid Network. Ilang beses na kasing namataan ang Concert King sa bakuran ng TV5 ka-meeting ang mga big boss ng network. Kahit sobra ang pagmamahal ng singer sa Dos at tumatanaw ito ng utang na loob, kailangan din niyang mag-survive dahil wala namang show na ibinibigay sa kanya ang Kapamilya Network. Matagal na panahong naghintay, umasa na baka-sakaling mabigyan uli siya ng show, pero bigo ang Concert King.
Ilang beses na palang inoperan si Martin ng ibang network pero tumanggi ito. Tipong napagod na sa kahihintay ang magaling na singer kaya nagdesisyon na itong tanggapin ang offer ng Singko.
Ayon sa nagbalita, mas malaki raw ang talent fee at isang regular musical variety show ang gagawin ni Martin sa TV5 na itatapat sa ASAP every Sunday.
Sa ngayon, ayaw munang mag-comment ang Concert King tungkol sa issue. Ibig kayang sabihin, totoo ang tsika na mag-o-ober da bakod na rin si Martin Nievera? Mismo!
AYAW Paawat!
by Eddie Littlefield
