PAGKATAPOS KUMPIRMAHIN ni Bianca Manalo sa Bandila na nauwi na sa break-up ang relasyon nila ni John Prats, at ang aktor ang nakipaghiwalay sa kanya, nakausap namin si John at nagbukas din ng saloobin niya sa naging paghihiwalay nila ng ex-girlfriend.
Aminadong nasasaktan sa mga masasakit na paratang sa kanya kung saan tinatawag siyang playboy, nang-iiwan ng babae at papalit-palit, ayon sa aktor hindi niya ito ginagawa dahil trip o hobby lang niya gaya ng iniisip ng iba, kundi may mga rason sa bawat desisyong ginagawa niya. Napapalaki kapag artista ang nakikipaghiwalay, pero gaya ng mga relasyon ng mga ordinaryong tao, dumadaan ito sa proseso kung saan natutUhan mong mahalin ang isang tao, may natutuklasan kayong hindi ninyo pinagkakasunduan at kaysa nga naman ipilit kung hindi na dapat ay mas mabuti pang tapusin na lang ito.
Bilang respeto sa pinagsamahan nila at kay Bianca, hiniling ni John na ibalato na lang sa kanila ang dahilan ng kanilang break-up. Klinaro rin niya sa amin na walang katotohanan ang pagkaka-link niya kay Sunshine Garcia, Sexbomb dancer at kasamahan niya sa Banana Split. Ipinaliwanag sa amin ng aktor na kaibigan niya si Sunshine, pati na rin ang boyfriend nito na minsan nga ay nakakasama nila dahil dumadalaw kay Shine sa set ng Banana Split. Nauugnay rin ang pangalan kay Angelica Panganiban, nagbigay-pahayag sa amin si John na matalik na kaibigan niya si Angelica at mas gugustuhin na lang niyang maging bestfriend ito habang buhay kaysa maging karelasyon na ilang taon lang ang bibilangin nila. Sa pagkaka-linked naman kay Sarah Lahbati, sa ngayon ay ‘di pa handa sa panibagong pakikipagrelasyon ang TV host/actor at kahit papaano ay pumapasok na rin sa isip niya na mas mabuti yata kung hindi taga-showbiz ang magiging susunod na karelasyon niya.
Sa ngayon, wala silang komunikasyon ni Bianca, pero bukas si John na isa sa mga araw na ito na magkakausap sila ng ex-girlfriend at magiging magkaibigan. Sa naging relasyon, napatunayan ni John na tinatrabaho talaga ang isang pagsasama at ‘di ito magiging matagumpay kung pag-ibig lang ang punadasyon nito dahil kailangan din ng respeto, tiwala at pang-unawa. ‘Di naman itinago sa amin na mahal pa niya ang ex at naging bahagi ito ng buhay niya, pero sa pakikipag-usap namin kay John, nakita namin na mukhang malabo nang magka-balikan sa ngayon ang dalawa.
Nakarating sa amin na sa ngayon daw ay tumutuloy si Bianca sa bahay ni Pokwang sa Antipolo na dating kasama nila sa Happy, Yippe, Yeheey at naging malapit nilang kaibigan.
SA MGA interviews ni Tito Alfie Lorenzo, nagbitaw ito ng salita na over his dead body ay ‘di niya papayagang makapareha ng alagang si Judy Ann Santos si Sam Milby sa isang serye na niluluto sa ngayon ng ABS-CBN.
Hiningan naman namin ng reaksyon tungkol dito ang aktor, at ayon kay Sam, ‘di niya alam kung ano ang ire-react niya patungkol sa naging pahayag ni Tito Alfie, pero tanggap niya sa industriyang ito na may mga tao na hindi ka magugustuhan o kundi man ikaw, ay ang manager mo.
Matagal nang nakilala si Tito Alfie, pero sa ngayon ay ‘di na sila nagkita pa uli, sa tanong namin kung kakausapin ba niya ang batikang columnist/talent manager kung magkita sila, ay hindi ang sinagot sa amin ng aktor at hahayaan na lang niya ang management niya na gumawa nito para sa kanya. Excited na makatrabaho si Juday kung saan hinahangaan ni Sam ang husay sa pag-arte at naniniwala siya na marami siyang matutuhan sa aktres, nandu’n pa rin ang hiling ni Sam na sana ay matuloy ang nasabing serye na ito ng ABS-CBN.
Kinumusta namin kung may komunikasyon pa sila ng model/teacher na nakilala niya sa New York, na bukas siya sa pagsasabing nagustuhan niya, inamin ni Sam na may mag-iisang taon nang karelasyon ang nasabing modelo at pinili na rin niya na huwag itong makausap nang madalas bilang respeto na lang sa karelasyon nito. Nagbigay pahayag sa amin ang aktor na hinding-hindi siya papasok sa isang relasyon na commited ang babae sa iba. Naninwila raw sa karma ang aktor na kung ikaw ang malagay sa ganitong sitwasyon, ‘di mo gugustuhing ligawan din ng iba ang girlfriend mo.
Maiba Lang
By MELBA R. LLANERA
