WALA RAW MUNANG balak ang mag-asawang Claudine Baretto at Raymart Santiago na sundan ang anak nilang si Santino, dahil masaya na raw sila sa kanilang dalawang anak.
Sa shooting ng pelikulang In Your Eyes na pinagsamahan nila nina Richard Gutierrez at Anne Curtis, naikuwento ni Claudine na napag-uusapan daw nila ni Raymart na baka puwede na siyang mabuntis uli para masundan na si Santino. Pero kapag tinatanong naman daw nila ang kanilang anak, ayaw raw nila dahil happy na raw silang dalawa lang.
Minsan daw gusto ng dalawang anak nilang magkaroon ng kapatid, pero madalas ay ayaw raw nila. May pagkaseloso raw ang mga anak nila at sa ngayon ay happy na raw silang dalawa lang muna.
Sey naman ni Claudine, sa sobrang puno ng schedule niya ngayon, mahirap daw na mabuntis siya. Kaya paplanuhin pa raw muna nila iyan ni Raymart.
Kunsabagay, malaki na ang bunsong anak nilang si Santino dahil nagka-crush na nga raw ito ngayon. Ang latest daw na type na type ng kanyang anak ay si Georgine Wilson. Nakita raw ito minsan ni Santino sa Manila Polo Club, at nagtanong daw talaga kung sino ang pretty girl na ‘yun. Pagkatapos nu’n ay sinabi raw ni Santino kay Claudine na gusto niyang makilala ang pretty girl na ‘yun. Kaya lang, hindi magkakilala sina Claudine at Georgina kaya ikinuwento na lang niya ito kay Richard na close naman kay Georgina.
Exclusive na na-interview si Claudine ng Startalk at tinanong ito kung puwede na bang mag-guest si Mark Anthony Fernandez sa drama anthology niyang Claudine.
“Okay na kami. Nagkausap na sila ni Raymart. Ayoko na lang ikuwento sa lahat pero matagal na kaming nagkaayos,” sagot ng aktres.
Kung sakaling may magandang materyal na puwede nilang pagsamahan sa Claudine, puwede naman daw depende sa availability ni Mark Anthony. Pero tingin ni Claudine, huwag muna ngayon, dahil medyo maaga pa.
Abangan n’yo sa Startalk ang kuwentong iyan at pati na rin ang exclusive interview namin kay Richard tungkol naman sa lovelife niya na ayaw muna niyang pag-usapan, pero obvious namang si Jewel Mische ito.
BUKAS DIN SA Startalk ay may exclusive interview rin kami kay Miriam Quiambao na ngayon lang na-grant ang annulment ng kanilang kasal, kasabay rin ang divorce nilang mag-asawa sa Hong Kong.
Kung natandaan n’yo pa, bukod sa Hong Kong ay nagpakasal din dito sa Boracay sina Mariam at ng kanyang Italyanong asawa. Pero hindi nagtagal ang kanilang pagsasama, nagkahiwalay rin at ngayon lang naayos ang legalidad ng hiwalayang ‘yun.
Maraming isyung dapat sagutin si Miriam dahil hindi malinaw kung ano talaga ang tunay na dahilan ng hiwalayan.
Totoo kayang sa loob ng ilang taon na pagsasama nila, anim na beses lang daw silang nagkainiig na mag-asawa?
May isyu pang bading daw itong Italyanong napangasawa niya kaya abangan kung ano nga ang sagot ni Miriam dito.
Abangan n’yo ‘yan dahil mas bonggang-bongga na ngayon ang Startalk namin na ka-back-to-back ng Showbiz Central.
Mga Mata ni Lolita
by Lolit Solis
