AGAD NA pinabulaanan sa amin ni Nikki Gil ang kumalat na balitang break na raw sila ng boyfriend na si Billy Crawford. Kamakailan kasi ay naging usap-usapan na nauwi na raw sa hiwalayan ang ilang taong relasyon ng dalawa kung saan lumabas na pressure daw ang dahilan sa parte nina Nikki at Billy, at ‘di lang daw inaamin ng mga ito ang nangyari sa kanila.
Ayon kay Nikki, maayos at masaya sila ng boyfriend sa kanilang relasyon. Maaa-ring ang napagbasehan ng iba ay baka nagkaroon sila ng kaunting misunderstanding ng boyfriend na normal naman talaga sa isang relasyon, pero inakala na agad ng iba na nauwi na nga sa break-up. Kilala namang pribadong tao, ayaw magbigay ng TV host/actress na kadalasan ay rason ng ‘di pagkakaunawaan nila ng boyfriend, pero siniguro niya sa amin na ‘pag nagkakaroon sila ng kaunting tampuhan ay agad nila itong inaayos at ‘di pinapatagal.
Hindi rin maintindihan ni Nikki kung bakit naibigay na rason ay may pressure daw sa kanila ni Billy kaya raw sila nag-break-up. Lumang issue na rin naman kung lalabas na naman na may third party involved sa parte ni Billy dahil ilang beses nang nabalita nang ganito ang aktor na kalaunan ay lumalabas din naman na walang katotohanan.
Napapanood si Nikki sa Mundo Man Ay Magunaw ng Kapamliya Gold ng ABS-CBN, kung saan marami ang napapahanga sa husay mag-kontrabida ng TV host/ actress.
NAKAUSAP NAMIN si Erik Santos last Sunday sa rehearsal ng Star Magic Tour in Hawaii para sa kanilang 20th anniversary at masayang ibinalita sa amin ng singer na nagkita sila kamakailan ng dating manager na si Tito Boy Abunda. Nangyari ito sa looby ng ABS-CBN pagkatapos mag-Bandila ng mahusay na TV host cum manager, kung saan ayon kay Erik ay naging maganda ang pagkikita nilang dalawa at very warm naman ang ipinakitang trato sa kanya ng dating manager. ‘Di naman itinago sa amin ni Erik na sobra niyang na-miss si Tito Boy, lalo’t matagal-tagal na rin nang huli silang nagkita at nagka-usap.
First time makakasama sa Star Magic Tour, kung saan pagkatapos ng show ay lilipad agad sila nina Vina Morales, Jovit Baldivino at Yeng Constantino papuntang LA para sa isang TFC event. Masaya rin sa mainit na pagtanggap ng tao sa album niyang Awit Para sa Iyo, ibinalita sa amin ni Erik na sa taong ito ay may isang major concert silang hinahanda.
NA-INTERVIEW NAMIN si PNP Chief Nicanor A. Bartolome sa nakaraang pagbubukas ng 2nd PNP Film Festival sa PNP Multi-Purpose Hall sa Camp Crame, kung saan masayang inanunsiyo ng PNP Chief na ngayon ay ‘di lang ito para sa mga estudyante, kundi maging sa mga indie filmmakers. Ang layunin ng nasabing film festival ay makagawa ng mga pelikulang magpapakita ng mga mabubuting asal ng mga Kapulisan tulad ng tapang, katapatan at mga panganib na hinaharap nila para magampanan nang buong-puso ang kanilang mga tuntunin. Maipalalabas ang mga napiling entries sa August 1 sa ilang piling SM Cinemas at idadaos naman ang 2nd PNP Film Festival awarding sa August 6 sa Newport Performingf Arts Theater sa Resorts World.
Nagsilbing hosts sina Bayani Agbayani at Jodi Sta. Maria na parehong nagsabi na handa silang maging parte ng mga pelikulang sasali nang libre ang kanilang serbisyo. Present naman sa nasabing okasyon ang OMB Chairman na si Mr. Ronnie Ricketts at nagpadala naman ng representative ang MTRCB Chairman Ms. Grace Poe Llamanzares na parehong nagpahayag ng suporta nila sa proyekto na ito ng PNP.
Maiba Lang
By MELBA R. LLANERA
