MARAMI na naman ang maiinggit kay Aljur Abrenica, dahil bukod sa mahahalata na naman ngayon na talagang nakatututok sa kanya ang panahon ng GMA-7 para patuloy siyang pasikatin, iyon naman talaga ang nangyayari. Kasi nga, sa bakuran ng Kapuso network, siya rin naman ang paborito ngayong makapareha ng mga pinasisikat din nilang aktres. At maging ang mga datihang artista ng Siyete ay naaaliw na makatrabaho ang guwapong aktor, dahil simple lang siya, at hindi pa showbiz na showbiz ang dating.
Masarap daw paglaruan ngayon ang showbiz career ni Aljur, dahil parang ang dami-daming pupuwedeng mangyari. Una na nga riyan ‘yung sobra siyang pinagpapantasyahan ng kabadingan at kababaihan. Konting hasa pa sa kanyang acting ability, kandidato na siyang humilera sa mga nagkakaedad nang sina Dingdong Dantes, Richard Gutierrez at Dennis Trillo na mga pambatong aktor ng GMA, na mga narating na ang kasikatan ng pagiging artista nila.
Magkapareha ngayon sina Aljur at Rhian Ramos sa bagong teleserye ng Siyete. Nakakalalaki siyempre ang dating ngayon ng sex appeal ni Aljur, dahil noon pa man ay sinabi na niya na crush niya si Rhian, at iyon ay sa panahong magka-loveteam pa sila ni Kris Bernal. Nagkakalapit na siyempre ngayon sina Aljur at Rhian, dahil pinanindigan talaga ng guwapong aktor ang sinabi niya noon, na gusto talaga niyang maging close sa tisay na young actress.
Sa dami ng mga magseselos kay Aljur sa closeness nila ngayon ni Rhian, isa kaya si DJ Mo Twister sa mga makakaramdam ng aray sa puso?
KAHIT umamin na si Ara Mina tungkol sa kanyang lovelife, kung saan ay isang napakapribadong tao ngayon ang kanyang karelasyon, na bagama’t hindi niya ibinigay ang tunay na pangalan ng nasabing businessman, ay Moy ang palayaw na ipinakilala niya. Marami sa mga nagmamahal sa kanya ang nag-aabang kung sa kasalan na ba hahantong ang nasabing relasyon. Kasi nga, hindi na bumabata ang seksing aktres, lalo pa’t ang mga kasabay niyang umentra sa showbiz ay may mga asawa na.
Marami ang nagtataka kung bakit kahit sinabi ni Ara na tanggap naman daw siya ng pamilya ng bago niyang karelasyon ay hindi pa nila napag-uusapan ang tungkol sa kanilang pagpapakasal? Sa ngayon kasi, parang umaasa pa rin at naghihintay ang sister ni Cristine Reyes na pormal na siyang kausapin ng kanyang boyfriend tungkol sa dapat na maging plano nila sa pagkakaroon ng pamilya. Huwag tayong magpaka-morbida, pero siya na nga kaya ang huli at tamang lalake para sa aktres?
Marami pa naman siyempreng nakapilang mga manliligaw si Ara na pupuwede niyang pagpilian. Kapag ang kasalukuyan niyang karelasyon ay hindi pa niya nakatuluyan, nakakalungkot naman. Nakakaawa na rin si Ara, dahil mapagmahal siya sa kanyang pamilya, sobrang nagsipag na siya sa career para makapag-ipon, at lagi nga siyang sumasabak magnegosyo na sa dakong huli ay nagsasara at nalulugi rin naman. Ilang pagkabigo na rin sa mga nakaraang relasyon ang naranasan niya. Kaya dapat maging maligaya na rin siya talaga.
KUNG sa bakuran ng ABS-CBN ay nagsara na ang programang Wowowee ni Willie Revillame at napalitan na ito ngayon ng Pilipinas Win Na Win! nina Kris Aquino at Robin Padilla, ang programang Sharon naman ng Megastar na si Sharon Cuneta ang kinumpirma ni Direk Jose Javier Reyes na magsasara na rin daw. Pero nasa plano naman diumano, na bibigyan ulit ang mommy ni KC Concepcion ng bagong programa.
Marami siyempre ang nagugulat, dahil walang katiyakan ang mga pangyayari sa larangan ng telebisyon. Isang panggulat nga ang nangyari, na habang inaabangan ng kanyang mga tagasuporta ang pagbabalik ni Willie sa iniwan niyang programa, pagkatigbak pa ang nangyari. Ganu’n din naman itong Sharon na mukhang pinapaganda pa, pero hayan at pinag-uusapan na nga na mawawala na rin sa ere.
Ipinagdiriinan, na ‘yung sobrang katabaan daw ng Megastar bilang host ng programa ang isa sa hindi magandang tanawin sa nasabing show. Pero mayroong mga nagtatanggol naman, na huwag na raw gawin pang isyu ang katabaan ng aktres, dahil isa talagang malungkot na problema iyon. Hirap talagang magpapayat ang mommy ni KC dahil sa dinaanan niyang problema sa huli niyang panganganak sa bunso niyang si Miel Pangilinan.
ChorBA!
by Melchor Bautista
