MUKHANG MATUTULOY NA ang pagdalaw ni Marian Rivera sa Daddy niya sa Madrid, Spain sa susunod na buwan, kasama siyempre si Dingdong Dantes.
Ikinuwento ito ni Dingdong sa presscon ng bagong project ng Yes Pinoy Foundation niyang Book Run sa tulong ng National Bookstore na ini-endorse din niya.
Aalis ang magkasintahan patungong Dubai sa February 1 para mag-guest doon sa concert nina Ogie Alcasid at Regine Velasquez.
Ilang araw yata sila roon dahil may ilang lugar sa Middle East pa silang pupuntahan.
Pagkatapos nu’n, tutuloy na raw sila ng Madrid para matupad na rin ang matagal nang pangarap ni Marian na magkita sila ng Daddy niya.
Hindi na raw kasi makapupunta rito ang Daddy ni Marian dahil abala na ito sa mga negosyo niya kaya si Marian na mismo ang pupunta roon, at kasama na niya ngayon si Dingdong.
Sey ni Dingdong, sana maayos na raw ang mga papeles niya para matuloy na talaga. Pero tingin ko naman maayos nila ‘yan, ‘di ba?
Si Marian naman, ayaw pa munang ikumpirma ito dahil mahirap na at baka maudlot na naman daw. Kapag natuloy na sila, saka na raw na siya magkukuwento with matching pictures pa.
Excited na rin si Dingdong sa biyaheng ito dahil may mga kamag-anak din pala siya sa Madrid na matagal na rin niyang hindi nakikita. Kaya hindi lang ito para sa reunion ni Marian sa Daddy niya, kundi pati na rin sa kanya para sa mga kamag-anak niya roon.
Sa ngayon, pinagkakaabalahan muna ni Dingdong itong Book Run niya na isang marathon na gaganapin sa Bonifacio High Street, Taguig sa January 31.
Sa mga interesadong sumali, magpa-register lang daw sa halagang 400 pesos at kung puwede ay magdala raw sila ng mga lumang libro nila dahil iipunin ito ng Yes Pinoy Foundation para ipamigay sa mga paaralang hanggang ngayon ay hirap pa ring makabalik pagkatapos masalanta ng bagyong Ondoy at Pepeng.
Ang edukasyon talaga ang concern ng Yes Pinoy Foundation ni Dingdong dahil naniniwala siyang malaking bagay sa isang tao ang may pinag-aralan. Hindi gaya ng Rosanna Roces na iyan na walang halaga sa kanya ang edukasyon!
LUMALALA NA ITONG panibagong eskandalo nina Kris Aquino at James Yap. Kahapon sa The Buzz, napilitan nang magsalita si Kris, dahil nga raw sa ginagawa nang isyu sa kandidatura ni Noynoy ang ayon kay Kris ay ‘domestic issue.’
Inamin ni Kris sa programa nila ni Boy Abunda at Ruffa Gutierrez na pinuntahan niya ang bahay ng babae. Pero hindi naman daw niya sinugod. Mahinahon daw siyang nagtungo roon, at nu’ng una ay inimbitahan pa siya ng mommy nu’ng babae. Pero hindi na nga nga lang siya pumasok at hinintay na lang na lumabas ang babae. Hanggang sa magkausap nga raw sila ng babae, mahinahon pa rin daw ang pakikipag-usap ni Kris.
Kahit na nga raw na sinabihan si Kris ng kanyang mga kaibigan na ‘wag nang puntahan ang bahay ng babae, ginawa pa rin niya. Dahil kung mananahimik daw siya, paano niya maipagtatanggol ang kanyang pamilya?
Ang nakakaloka, inamin ni Kris na humingi siya ng space mula sa kanyang mister. Pagod na raw siya emotionally sa relasyon nila ni James. Inamin din niya na sa kapatid muna niyang si Pinky siya nakatira kasama ang mga anak niyang sina Josh at Baby James. Hindi kasama si James.
Sa estado nga raw ng kanilang buhay-mag-asawa, nasabi pa ni Kris na, “I’ve tried. God knows I tried. James also tried. But in my opinion, not hard enough.”
Marami ang kumakampi kay Kris dahil kahit saan natin paabutin, may karapatan pa rin ang asawa at dapat niyang malaman kung bakit tumatawag at nagti-text itong Mayen Austria kay James.
Pero sa kabilang banda, nagsasabi rin ang iba na hindi na dapat ito pinuntahan ni Kris dahil wala naman talaga at kumbaga hindi sila talo.
Kuwento nga ng isang source namin, parang napahiya pa si Kris nang nakita niya ‘yung babae dahil hindi naman kagandahan at ang pagkakaalam ko, classmate pa raw niya ito nu’ng kindergarten sila.
Pero lumaki lang ito at nakarating sa media dahil ang nagkalat naman yata ng text na nanugod si Kris ay itong babae kaya obvious na gusto lang siguro nitong manggulo lalo na’t matagal na raw itong avid fan ni James at baka type naman niya talaga siguro ang naturang basketbolista.
Sana naman si James na ang gumawa ng paraan at iniwasan na ito. O, ‘di kaya, maaga pa lang ay ipinaliwanag na niya ito kay Kris at nang hindi na umabot sa suguran at hiwalayan.
Mga Mata ni Lolita
by Lolit Solis
