AYAW NG ALAGA kong si Pauleen Luna na sagutin ang isyung pinagtutulungan siyang awayin ng mga hitad na Ampalaya Anonymous. Dahil nu’ng in-interview ang ilang miyembro ng grupong ito na sina Maxene Magalona, Glaiza de Castro at Bianca King, itinatanggi naman nilang may inaaway sila sa kanilang mga pinu-post sa Twitter account nila.
Wala naman daw silang pinaparinggan o binu-bully sa Twitter nila. Pero siyempre, may nakarating sa akin na kuwento. Since idini-deny naman nila, o ‘di wa na lang!
Basta si Pauleen, ayaw nang magsalita hangga’t wala siyang naririnig mula sa grupong iyan. Kahit may mga nagkukuwento sa kanya na may mga sinasabi ang ilan sa mga Ampalaya Anonymous, ayaw na niyang mag-react o patulan ito dahil ang cheap daw.
Pero ewan ko lang, kasi lumalaki na ang usap-usapang ito, kaya marami pang makakalkal sa kanila.
Ang dinig ko, isa sa inaaway ng isang miyembro ng grupong ito ay si Heart Evangelista. Pero mas palaban itong huli kaya natameme ang kumalaban sa kanya. Ano ang dahilan? Siyempre lalaki na naman! Hay, naku!
USAP-USAPAN NA PALA itong pag-boo kay Korina Sanchez sa concert ng Tears for Fears nu’ng nakaraang Linggo.
Kung napanood n’yo ang Tweetbiz nu’ng nakaraang Lunes, ikinuwento ni Tim Yap na nagulat siya nang nakarinig ito ng pag-boo ng mga tao nang ipinakita sa widescreen si Mama Koring na naka-Laban sign. Dalawang beses daw siyang ipinakita sa wide screen, dalawang beses din siyang na-boo! Nakakaloka, huh!
Ang paliwanag naman ni Tim, tingin daw niya, ang gusto lang ng mga taong nandu’n ay manood ng concert ng sikat na bandang ito hindi para mamulitika. Kaya parang off siguro sa kanila ang ginawa ni Korina du’n.
Ang lakas daw nang pag-boo sa kanya pero dedma lang daw siya na parang walang narinig.
Sobrang successful nga raw itong nakaraang concert ng Tears for Fears at balak sana nila ay magkaroon ng repeat sa May 10. Pero dahil sa eleksiyon, hindi na lang nila itinuloy at umuwi na yata ang bandang ito.
NAPAG-UUSAPAN NA RIN lang ang pulitika, naloka ako nu’ng Lunes ng hapon nang tumawag sa akin si Ruffa Gutierrez dahil nag-iiyakan daw ang mga anak niyang sina Lorin at Venice dahil gusto nilang magkaroon ng T-shirt ni Sen. Manny Villar.
Kasi naman, kabisadung-kabisado pala nila ang jingle ni Sen. Villar at ewan ko, basta type na type nila ito.
May dumating daw sa kanila na mga T-shirts nina Gibo at Gordon, pero dedma raw ang mga bata dahil ang type nila ang kay Villar.
Kaya tinawagan ako ni Ruffa kung puwedeng ihingi ko raw sa staff ni Sen. Villar ng T-shirts nito.
Tinawagan ko agad siyempre ang staff ni Sen. Villa para padalhan na sila ng T-shirts at siyempre, pinadalhan ko rin ng kay Sec. Mike Defensor, ‘no?! Bongga, ‘di ba?
Mga Mata ni Lolita
by Lolit Solis
