ABANGAN N’YO BUKAS sa Startalk ang exclusive interview ni Ricky Lo kay Ruffa Gutierrez tungkol sa isyu nila ni Kris Aquino.
Tinanggap naman ni Ruffa ang apology ni Kris, pero hanggang ngayon yata ay hindi pa rin naman siya tinatawagan para personal na mag-sorry.
Bale public apology ‘yun ni Kris. Pero siyempre, iba ‘yung magkausap sila ni Ruffa dahil magkaibigan naman sila.
Pero mukhang wala na ‘yun kay Ruffa at naging biruan na nga nila ito.
Kuwento ng Startalk reporter namin, nag-pictorial si Ruffa sa GMA-7 nu’ng kamakalawa ng hapon para sa pelikulang Working Girls ng Viva at GMA Films.
Bukod kay Ruffa, nandu’n din si Cristine Reyes dahil kasali rin ito sa pelikula.
Kausap ni Ruffa si Ricky habang nagpi-pictorial ito. Medyo nagugulo ito dahil nagpa-pictorial sa kanya ang ibang staff ng GMA Films na nandu’n sa studio. Sabi ba naman kay Ricky, “Naku Tito Ricky, iba ang level ng saya rito!” Kaya nagkatawanan na sila roon sa studio.
Dapat may isang linggo pa si Ruffa sa The Buzz pero mukhang hindi na ito babalik. Pero malay natin, baka mabago naman ang desisyon at magkausap naman sila ni Kris, biglang lilitaw na lang ito sa The Buzz.
Pero mabuting abangan n’yo ang kabuuan ng mga pahayag niya sa Startalk bukas.
Napansin din ng staff namin si Cristine na parang nakawala nang nandu’n na siya sa Studio 5 ng GMA.
Parang nagmamadali itong matapos ang pictorial dahil gustung-gusto na nitong umakyat sa GMA Artists Center office para kumustahin ang mga kasamahan niya roon at ang dating handler niya.
Nami-miss na nga raw niya ang mga dating katrabaho niya sa GMA. Pero siyempre, obvious namang mas type niyang magtrabaho sa ABS-CBN.
Nakorner nga ito ng mga reporter at siyempre muling tinanong sa kanya ang tungkol sa kanila ni Dennis Trillo.
Ganu’n pa rin naman ang sagot niya dahil wala naman daw nabago sa kanila, kundi talagang magkaibigan sila ni Dennis at natutuwa pa nga itong magkuwentong okay na rin sila ni Carlene Aguilar. Happy na raw siya sa trabaho niya ngayon at saka na lang muna ang lovelife.
ISA SA AABANGANG next leading man ng GMA-7 ay itong si Paulo Avelino na lalong gumuguwapo.
Bukod sa Ina, Kasusuklaman Ba Kita, kung saan ka-partner niya roon si Jennica Garcia, malaking break kay Paulo ang pagpalit kay JC de Vera sa Panday Kids. Kaya todo raw siya ngayon sa pag-eensayo sa gym dahil kailangang maganda ang katawan niya roon.
Sabi nga niya sa amin, parang mamatay na raw siya sa kadyi-gym dahil talagang isinisingit niya sa schedule para ma-achieve ang maganda niyang katawan.
Hanggang ngayon,hindi pa rin umaamin si Paulo na sila na ni LJ Reyes dahil mas mabuting tahimik na lang daw muna. Kung ano man daw ang relasyong meron sila ni LJ, kung puwede sa kanila na lang daw muna ‘yun.
Aminado naman siyang meron na silang mutual understanding at si LJ nga ang babaeng pinakamalapit sa kanya. Ang isa raw sa nagustuhan niya kay LJ ay ang pagiging matalino nito. Ang dami raw niyang natututunan sa young actress kapag kausap niya ito, kaya lalo silang nagkakalapit.
Sa totoo lang, kahit hindi naman sila kulitin, obvious namang sila na, eh!
Mga Mata ni Lolita
by Lolit Solis
