NGAYONG ARAW NA ito ang dapat ay unang araw nang suspension ng MTRCB para sa programang Showtime nina Vhong Navarro, Kim Atienza, Vice Ganda at Anne Curtis.
Ayon kay Miss Consoliza Laguardia, kailangan umanong tumupad ang ABS-CBN sa naging desisyon ng MTRCB.
“Honestly, nalulungkot ako dahil nanonood din naman ako ng Showtime, pero may batas tayong dapat sundin.
Nakagawa sila ng violation dapat lang na tanggapin nila kung ano ang kaparusahan nu’n.” Pahayag ni Laguardia na nagsabi pa rin sa Pinoy Parazzi na hindi siya “takot” sa nakaambang demandang isasampa sa kanya ng Dos sa Ombudsman, dahil una at higit sa lahat, malinis ang kanyang kunsensiya, maging ng buo nilang tanggapan sa kung ano ang kanilang ipinaglalaban. “Iginagalang ko kung idedemanda nila ako dahil sa naging desisyon ng MTRCB para sa suspension ng Showtime. Magkikita kami sa court, kung ‘yun ang gusto nila. Pero personally, wala akong galit sa kanila,” pagdidiin pa ng aming kausap.
Samantala, tungkol naman sa “pagluwa” ng boobs ni Anne Curtis na nangyari sa taping ng ASAP XV sa Boracay kamakailan, sinabi ni Miss Laguardia na sa ngayon ay wala silang magiging hakbang dahil ‘yung eksena nang pagkakatanggal ng bra ni Anne ay hindi pa raw naipalalabas sa telebisiyon.
“Kapag inilabas iyon, du’n lang siguro kami kikilos. Pero so far, wala pa namang ganu’ng pangyayari kaya hindi ako puwedeng mag-react,” sabi pa ng aming kausap.
Sa kabilang banda, mukhang “nanganganib” na naman ang Wowowee ni Willie Revillame dahil paikli nang paikli na naman ang suot ng kanyang mga dancer na animo’y nasa loob ka ng beerhouse sa katanghaliang tapat.
“Hindi muna ako makapagko-comment tungkol sa bagay na iyan. Sa ngayon, wala pa naman tayong natatanggap na reklamo laban sa kanila. Pero kung may magrereklamo, du’n lang tayo kikilos.” Pagwawakas pa ni Miss Laguardia, ang MTRCB chairman na may pinakamatagal na serbisyo sa nabanggit na tanggapan.
MARIING ITINANGGI NI Phoemela Barranda ang balitang siya na ang “next’ na tinatarayan ni Kris Aquino sa programang The Buzz. Ayon kay Phoem, totoo raw na kung minsan ay nagbibigay-suggestion sa kanya si Kris, pero hindi raw niya iyon minamasama dahil bukod sa kaibigan niya si Tetay ay malaki ang paggalang niya rito.
“Alam ko naman na hindi ako bibigyan ng suggestion o pupunahin ni Kris kung hindi niya ako itinuturing na kaibigan. Kaya very vocal siya sa akin, dahil mahalaga ako sa kanya.” Tuluy-tuloy na pahayag ni Phoem na nakausap namin sa contract signing ng bago niyang commercial na Hung Out, isang food supplement.
Sa kabilang banda, inamin ni Phoem na pansamantalang sarado ang kanyang puso pagdating sa pag-ibig.
“Mas mabuti na siguro ‘yung ganito, mas mabibigyan mo ng oras ‘yung work,” na ang tinutukoy ni Phoem ay ang dati niyang katipan na si Ira Cruz, na matagal na rin niyang minahal. “Pass muna ako sa lovelife!”
More Luck
by Morly Alinio
