GALIT NA GALIT si Sunshine Dizon sa Showbiz Central nang magpa-interview sa Startalk nu’ng kamakalawa ng hapon.
Napanood kasi nila ang plug ng Showbiz Central na ipinakita ang kuha nila sa asawa ni Sunshine na si Timothy Tan na parang nasa loob ng rehas.
Kinunan pala nila si Tim sa may gate nang pumunta sila sa bahay nito sa Pampanga. Hindi nagpa-interview si Tim, pero hinarap naman sila. Kaya lang ang kuha nila, parang nasa loob ng rehas na parang nakakulong.
Ang daming kamag-anak daw ni Tim ang nakapanood na ang buong akala nila, nakulong ito dahil sa aksidenteng nabangga ang isang babae na ikinamatay nito.
Nu’ng na-interview namin via phone patch, galit ang aktres na nagsalita na sana hindi ito ginawa sa kanila ng Showbiz Central dahil hinarap naman daw sila nang maayos ng asawa niya. Ang dami raw tuloy nag-alala dahil ang buong akala nila, nakulong ito.
Naayos naman daw nila ang babaeng nabangga ni Tim kaya hindi ito nagsampa ng demanda. Kaya sana, inayos naman daw ng Showbiz Central ang medyo nakakalitong plug na inilabas nila.
Kinumusta na rin namin kay Sunshine ang kalagayan nito at okay naman daw siya, pero talagang na-trauma raw siya sa nasaksihan niyang aksidente kaya patuloy pa rin itong minu-monitor ng kanyang doktor.
Sa December 17 daw ang susunod niyang check-up at magpapa-ultrasound daw ito. Malamang na malalaman na raw kung ano ang kasarian ng baby na dinadala niya.
Ang expected due daw nito ay sa April 28 kaya pinag-iingat pa rin ito.
SA HULING INTERVIEW ng Startalk kay Regine Velasquez, nilinaw nito ang isyung pagli-live-in nila ni Ogie Alcasid.
Sinabi niyang engaged na sila ni Ogie nang napagkasunduan nilang mag-live-in na. Sa bahay sila ni Regine at sabi nga nito, bahay na rin daw iyun ni Ogie.
Tatlong taon na pala silang nagli-live-in at tingin daw nito, mas okay ang ganu’n para lalo nilang makilala ang isa’t isa. Ang dami raw niyang natutunan nang makipag-live-in na ito, lalo na ang pagluluto. Ang dami nga raw niyang nilutong type na type ni Ogie, kaya talagang natutunan na nito ang mga trabaho niya bilang asawa bago sila magpakasal.
Sabi pa ni Regine, adjustment daw nila halos araw-araw iyan, pero at least kilala na raw nila ang isa’t isa at lalo raw niyang minahal si Ogie. Siyanga pala, pagkatapos ng kanilang kasal, magbabakasyon daw sila sa Bohol, dahil dadalhin nila doon sina Michelle Van Eimeren at ang dalawa nilang anak.
Ipinangako raw kasi nina Regine at Ogie sa asawa ni Michelle na si Mark Murrow na ililibot nila ito sa Pilipinas para makita raw nito ang mga magaganda nating beaches. Isa na nga rito ang Bohol.
Kaya baka isipin daw ng iba na kasama pa sina Michelle sa kanilang honeymoon, hindi pa raw ‘yun. Kasi ang balak talaga nilang honeymoon ay sa Italy na gagawin nila ito pagkatapos ng taping ni Regine sa I Heart You Pare.
Mga Mata ni Lolita
by Lolit Solis
