MEDYO HUMUPA nga-yon ang isyu ng mag-asawang Raymart Santiago at Claudine Barretto laban kay Mon Tulfo.
Ang daming pinagkaabalahan ngayon ng mga tao. Ang controversial na concert ni Lady Gaga, ang pagsalang kay Chief Juctice Corona, at kung mananalo ba si Jessica Sanchez sa American Idol.
Kahit nagra-rally ang ilang mga grupo laban kay Lady Gaga, ang dami pa ring nakigulo at dumagsa sa concert nito nu’ng kamakalawa ng gabi. Meron pa kagabi na gusto ring ipatigil ng mga nagra-rally. Pero wala naman silang magagawa, kundi ituloy ito.
Ang dami na ring nakisakay sa kasikatan ni Jessica Sanchez. Ang dami nang nagki-claim na kamag-anak niya, pero ewan ko ba kung na-appreciate ni Jessica ang sobrang suportang ibinibigay ng mga Pinoy sa kanya. Pero kahit ano pang sabihin nila, sana nga si Jessica ang mag-win.
Samantala, hindi pa muna masagot ni Sen. Bong Revilla ang ‘di pagkatuloy ni Ai-Ai delas Alas sa pelikula nila ni Vic Sotto dahil naka-focus ito ngayon sa Impeachment Trial ni CJ Corona. Kahapon ito isinalang, na I’m sure, sa kanya nakatutok ang buong bansa, at hinuhusgahan na nga kung nagsasabi ito ng totoo. Matagal pa siguro ‘yan kaya ewan ko kung kailan magkaroon ng linaw ang kasong ito.
Ang hindi pa malinaw kung sino na ang ipapalit nina Sen. Bong at Bossing Vic kay Ai-Ai.
Ang dinig ko, si Judy Ann Santos daw ang iniisip nila pero hindi pa yata sila nagkausap. Gusto siyempreng malaman ni Juday kung ano ang partisipasyon niya at kung ano ang magiging role nito. Maganda rin naman kung si Judy Ann na ang kukunin nila at sana nga matuloy na ito.
Si Ai-Ai naman, quiet muna sa plano niya sa buhay nito. Ang sabi niya kasi, “private matters” daw ang dahilan kung bakit hindi muna siya gagawa ng pang-MMFF.
Ang “private matters” na tinutukoy niya ay ‘yung balak na pagpapakasal nila ng non-showbiz boyfriend niya. Sabi raw kasi, sa December na sila magpapakasal. Pero alam n’yo naman na matagal pa ‘yun. Hindi kaya magbago ang isip ni Ai-Ai? Pero matagal na niyang pangarap ‘yan, kaya isa rin kami sa naghahangad na sana nga matuloy.
Ang gusto ko lang namang malaman kung aprubado ba ito ng mga anak niya? Meron kayang pre-nuptial agreement?
Ang sabi naman nila, may kaya naman daw itong non-showbiz boyfriend ni Ai-Ai, kaya hindi naman datung nito ang habol niya.
Unfair naman daw na pagbintangan nang ganu’n ang boyfriend niya. Tingnan na lang natin kung ano ang mangyayari sa December.
NAMUMROBLEMA NGAYON ang production staff ng Daddy Dearest ng GMA-7 dahil sa biglang nabuntis na naman pala uli si Roxanne Guinoo.
Maganda na sana ang role niya sa telefantasyang ito, pero paano nga kung biglang lumaki na ang tiyan nito?
Kahit nakapag-taping na si Roxanne, pinag-iisipan pa rin nila kung itutuloy pa ba nila ito dahil kahit nga sa paglilihi nito ngayon ay medyo nahirapan daw siya. Kaya wala pa silang sagot kung matutuloy pa ba ito.
Kasama rin pala rito sa Daddy Dearest ang alaga kong si Pauleen Luna at type niya ang role niya rito kahit medyo mahirap.
Mga Mata ni Lolita
by Lolit Solis
