NAG-IINIT PA lang ang break-up issue kina Derek Ramsay at Angelica Panganiban, Shaina Magdayao at John Lloyd Cruz, heto’t nakaagaw agad ng pansin ang balak daw na pagsasampa ng demanda ng pamilya ni Albie Casiño laban kay Andi Eigenmann at sa mga kabarkada raw nito na nambugbog sa young actor.
Nangyari ang nasabing insidente sa Fiamma Bar sa Makati na pagkatapos daw sabuyan ng alak at sampalin ni Andi ang ex-boyfriend at sinasabing ama ng anak at hindi siya pansinin nito ay sinundan daw si Albie ng mga kasama ni Andi sa parking lot at dito ay pinukpok ito ng bote ng alak sa ulo at sa ibang parte ng katawan.
Sa press statement na inilabas ni Andi, inamin nito na totoong sinabuyan niya ng alak at sinampal ang ex-BF, pero idenenay nito na may kinalaman siya sa pambubugbog.
Ayon kay Andi, tiningnan daw kasi siya ng masama ni Albie at nasaktan siya, sabay balik sa isip niya ng mga ‘di magagandang pinagdaanan nila ng ex-BF kung kaya’y nasampal niya ito. Kinilala ang mga kabarkada ng aktres na nanakit sa young actor na anak ng isang namayapang rapper/actor, anak ng isang Senador, kung saan anim daw ang nambugbog kay Albi na pawang sampung taon daw ang tanda kaysa kay Albie na magdidisi-nuwebe anyos sa darating na May 14.
Nagpa-blotter naman ang mga magulang ni Albie na sina Mrs. Rina at Mr. Bonjet Casiño kagabi, May 5, sa Precinct 6 ng Makati Police Station at dito ay nagbigay-pahayag ang ina ng young actor na nanahimik sila sa loob nang matagal na panahon, pero ngayong nasaktan na ang kanilang anak sa pisikal at emosyonal na aspeto, itutuloy nila ang demanda at ipaglalaban ang hustisya sa mga gumawa nito sa kanilang anak.
BALITA RIN na nauwi na sa break-up ang ilang buwan ding relasyon nina Jewel Mische at Jason Abalos. Sa nakarang interview ng aktor, inamin nito na espesyal sa kanya si Jewel at consistent pa rin si Jason sa pagsa-sabi na maganda ang itinuro sa kanya ng relasyon nila ni Jewel dahil naging mas malapit siya sa Diyos.
Sinubukan naming ma-interview dati ng ilang beses ang aktres pero iwas itong magbigay lagi ng komento ‘pag pinag-uusapan si Jason. Ngayong balita na break na sila ng aktor, ayaw pa ring magbigay ng pahayag niya si Jewel, kung saan ang tanging nasabi nito sa amin ay mas mabu-ting si Jason na lang ang tanungin namin tungkol dito.
Ayon sa aktres, bilang pagrespeto na lang sa aktor, ayaw niyang magsalita. Pero sa ngayon ay masasabi niya na wala siyang karelasyon.
Siniguro rin sa amin ni Jewel na okay siya at ang pokus niya ay ang mga trabahong ibinibigay sa kanya ng ABS-CBN. Sa takbo ng mga binitawang salita sa amin ni Jewel, mukhang nauwi na nga talaga sa hiwalayan ang isang relasyon na ‘di niya inamin kahit kailan.
Maiba Lang
By MELBA R. LLANERA
