KAHIT ANONG DENY nina DJ Mo Twister at Rhian Ramos, nakapagdududa naman sila dahil open na open na sila sa kanilang closeness.
Naging usap-usapan na nu’ng nakaraang birthday ni Rhian na bongga ang iniregalo ni DJ Mo sa kanya.
Isang Cashmere bathrobe na matagal na palang gusto ni Rhian na magkaroon ng ganu’n. Hindi alam ng iba iyon pero si DJ Mo alam, kaya ipinag-order pa niya ito sa Amerika na pagdating naman, kinain-kain daw ng alaga niyang aso.
Akala nga namin hindi na iyon naibigay ni DJ Mo, ‘yun pala nabigay rin niya kay Rhian dahil hindi naman gaanong nasira at kinagat lang daw iyon ng aso niya.
Kaya sobrang touched si Rhian at sinabi nito sa mga interview na ngayon ay aware na siya na gusto siya ni DJ Mo, pero hindi pa niya masasabi kung ie-entertain ba niya ang panliligaw nitong radio personality/TV host.
Tingin ko naman may espesyal silang pagtitinginan dahil si DJ Mo pa pala ang gumastos ng birthday party ni Rhian na inayos ni Bianca King.
Magkasama pa raw silang nagwi-wheatgrass diet kaya tingnan na lang natin kung ma-develop nga ‘yang magandang pagtitinginan o magkaaminan din bandang huli. I’m sure ayaw ng GMA Artists Center ‘yan!
Paano naman ngayon si Aljur Abrenica na nabalitaan ko ring unti-unti na rin itong nadi-develop kay Rhian?
Lalo na nga raw silang naging close sa Ilumina kaya malay rin natin, ‘di ba? In fairness, waging-wagi ang loveteam nila sa Ilumina dahil consistent na mataas ngayon ang rating at lalong gumaganda ang kuwento nito, kaya talung-talo nito ang katapat na Idol ni Sarah Geronimo.
MAGANDA NAMAN PALA ang ipinakitang kababaan ng loob ni Pilita Corales nang sinabi nito sa Star Awards for Music na gusto na nitong makipag-peace kay Lotlot de Leon.
Iba na ngayon ang tono ng mga sagot niya nang hiningan ito ng sagot sa sinabi ni Lotlot na kahit na anong mangyari, may kuneksiyon pa rin sila dahil anak ni Lotlot ang mga apo niya.
Agree naman doon si Pilita at sinabi nga niyang ayaw na niyang magsalita pa ng ‘di maganda dahil nakikita naman niyang wala namang gulo sina Monching at Lotlot.
Nang tinanggap nga ni Pilita ang Lifetime Achievement Award niya sa Star Awards for Music, ibinahagi rin niya ang award na ‘yun kay Lotlot.
Gusto na raw niyang kausapin si Monching na pag-ayusin na sila dahil ayaw na raw niyang magbangayan pa sila ni Lotlot.
Nakarating na rin ito kay Monching at gusto nga raw niyang mag-usap sila na hindi na kailangang iparating pa sa media. Mabuting magkaayos na lang daw sila privately para okay na ang lahat, alang-alang na rin sa mga bata.
Mga Mata ni Lolita
by Lolit Solis
