NAKAHINGA NA NGAYON ng maluwag si Aljur Abrenica dahil ibinasura ng DOJ ang kasong Child Abuse na isinampa sa kanya nitong babaeng si Michelle Saludo na nag-promo girl sa Puerto Galera nu’ng nakaraang Holy Week.
Doon nagkita sila ni Aljur, nagkakilala at naintriga, na idinenay naman ng young actor.
Dahil doon, nagalit itong si Michelle at nagsampa ng kaso laban kay Aljur dahil sa hinipuan daw siya nu’ng nagkainuman sila.
Nang nakausap ng Startalk ang abogado ni Aljur na si Atty. June Ambrosio, ipinaliwanag nito kung bakit ibinasura ang kaso.
Hindi raw kasi magkatugma ang mga pahayag nitong si Michelle na nagreklamong hinipuan siya ni Aljur. Kung talagang hinipuan nga siya na hindi nito nagustuhan, sana nu’ng oras na ‘yun ay nagreklamo na siya dahil kasama naman yata nito ang magulang niya roon sa Puerto Galera.
Nakasaad din daw sa pahayag niya na kaya siya nagsampa ng kaso dahil sa idinenay siya ni Aljur nu’ng naintriga silang dalawa at napahiya raw ito nang husto sa mga kaibigan niya at kaklase.
Conflicting nga ang mga statement nito kaya walang basehan ang kasong isinampa niya, kaya ibinasura ng DoJ.
Hindi ko pa alam kung ano ang susunod na hakbang na gagawin ng kampo ni Michelle, pero si Aljur ay natutuwa dahil natapos na rin daw ang isang problemang hinarap niya noon.
Sa mga interview nito noon pa man, sinasabi na niyang wala siyang dapat ikatakot dahil nasa katotohanan lang daw siya kaya willing naman daw siyang harapin ang kasong ito. Mabuti naman at lumabas nga raw ang katotohanan na talagang wala siyang ginawa laban sa babaeng ‘yun.
Bukas ay special guest namin si Aljur para sagutin ang isyung ito. Magpu-promote na rin siya ng nalalapit niyang solo concert sa Zirkoh Morato sa March 26 na pinamagatang I’m Yours na alam kong todo pa-sexy siya rito with special guests Kris Bernal, Allan K at Jolina Magdangal.
Siyempre, suportado siya ng mga kasamahan niya sa The Last Prince.
ANG ISA PANG nabalitaan kong naibasura na rin ay ang kasong isinampa ng pamilyang naiwan ng nasirang PA ni Richard Gutierrez na si Nomar Pardo.
Nu’ng Sabado pa namin narinig ang balitang ‘yun pero walang nagkumpirma dahil wala pang naibabang resolution mula sa DoJ.
Ibinasura na rin daw ang kasong ito na isinampa laban kay Richard kaya tapos na rin ang kasong ito na dating nagpabigat din sa aktor.
Kaya masayang-masaya siyempre si Annabelle Rama dahil lahat daw ng ipinagdarasal niya sa Sto. Niño sa Cebu ay dininig at maganda ang taong ito para sa kanila.
Nanalo rin si Ruffa Gutierrez sa custody ng mga anak nila ni Yilmaz at ito nga ngayon, ang isa sa pinakamabigat na kasong isinampa kay Richard.
Ngayon ay maluwag na raw ang dibdib ni Richard na maipagpapatuloy ang trabaho niya.
Isa na rito ang nalalapit niyang paghu-host ng season 3 ng Survivor Philippines at ang pelikulang pagsasamahan nila ni Claudine Barretto.
Nagsilbing leksiyon kay Richard itong mga pinagdaanan niyang problema nu’ng nakaraang taon kaya malaki ang pasasalamat niya na natapos na ito.
Hindi ko lang alam kung patuloy pa rin ba nilang tutulungan ang pamilyang naiwan ni Nomar.
Mga Mata ni Lolita
by Lolit Solis
