AFTER NG Survivor na magtatapos na ngayong Biyernes (February 10), sa isang bagong primetime series ng GMA-7 naman sunod na masusubaybayan ulit si Richard Gutierrez. At excited nga raw ang binata na balik na naman siya sa pag-arte.
“Kasi medyo matagal akong nawala sa acting,” aniya nang makakuwentuhan namin last Sunday sa Party Pilipinas. “Puro hosting recently ang mga ginawa ko. So, back to basics naman. Back to soap operas. And I’m very excited.”
Isa si Carla Abellana sa pinagpipi-liang maging leading lady niya.
“Oo nga,” nangiting reaksiyon niya. “And I haven’t worked with her. So, it would be good to work with her and see kung may chemistry kami o wala. But more than anything, isa siya sa mga leading ladies ng GMA na hindi ko pa nakakatrabaho, so I’m very excited to work with her.”
Gusto rin daw niya na makapag-portray ng isang bago at mas challenging na role kumpara sa mga nagampanan na niya dati.
“Well, kasi nga, coming from last year… I did Captain Barbell na nagawa ko na before. And then puro hosting jobs na ‘yong sumunod. I asked the writers of GMA, the creative team to challenge me this year and come up with something na hindi ko pa nagagawa which is the traditional soap opera. So, it would be a good challenge for me. And, ah… ‘yon ang gusto ko, eh. Iyon ang hinahanap ko.”
Walang balita sa current status ng kanyang lovelife. How is he celebrating Valentine’s Day?
“Uhm… hindi ko pa alam, eh,” bahagyang natawang sabi ni Richard. “Pero, may mga pinaplano na kaming magkakapatid na mag-a-out of town kami.”
Wala siyang someone special na ka-date sa mismong Araw Ng Mga Puso?
“Marami. Marami akong special someone,” pagtukoy niya sa mga taong malalapit sa kanya.
Pero kung girlfriend o karelasyon daw… wala umano nga muna sa ngayon.
“Relaxed lang muna. Ngayon naka-focus ako sa work, siyempre. At ‘yon ang main priority ko… work right now,” panghuling nasabi ng aktor.
NAINTRIGA ANG marami matapos ang surprise appearance ni Ronald Singson sa Party Pilipinas para i-greet ng happy birthday si Lovi Poe. Para kasing hindi naman daw nag-break ang dalawa. At iyon nga ang gustong itanong ng media nang lumabas na sila sa studio ng GMA-7.
Tinangka man ni Lovi na hatakin si Ronald para makaalis na sila at makaiwas sa interview, hindi na nakagalaw ang dating kongresista nang ma-corner na ng mga naroong TV crew. Siyempre, nakisawsaw na rin kami sa mabilisang panayam na iyon..
“Nilakasan ko na lang po ang loob ko. Nagpakapal na lang po ako,” ani Ronald patungkol sa live appearance niya sa Party Pilipinas.
“Dapat magpapaabot lang ako ng flowers. But I chose to greet her personally.”
Sa tanong kung nagkabalikan nga ba sila, ang pahayag ni Ronald: “We’re just working on our friendship for now. ‘Yon lang.”
He’s not making any move to win her back?
“Wala pa namang usapang gano’n. Right now, happy naman kami. Maganda naman ang pagkakaibigan namin. And, uhm… we’re both happy about that. At least hindi nawala ‘yong friendship.”
Nakulong si Ronald sa Hong Kong for one and a half years nang dahil sa kasong illegal possession of drugs. Ngayong nakalaya na siya, ano ang mga bagay na inaasikaso niya?
“Ah… spending time with my family. Siguro magku-concentrate muna tayo sa business. And, I’m just taking it slow. Inuunti-unti ko lang muna,” panghuling nasabi ni Ronald.
Rubbing Elbows
by Ruben Marasigan
