NAGREREKLAMO RAW ANG stand-up comedienne na si Rufa Mi dahil feeling niya ay nabastos siya ng singer na si Richard Poon.
Nag-show kasi sila sa isang casino branch kamakailan. Unang isinalang si Rufa Mi dahil main act si Richard. Hindi pa raw tapos ang pagpapatawa ng hitad ay bigla raw umeksena itong si Richard at inagaw raw mula sa dalaga ang mikropono.
Ang tsika, nagsalita raw si Richard at sinabing kailangan na niyang kumanta dahil may pupuntahan pa siya. Wala naman daw nagawa ang pobreng si Rufa Mi kung hindi pagbigyan ang nagmamadaling si Richard.
Ang akala ng mga taong nanood ay part ng comic act ni Rufa Mi ang ginawa ni Richard kaya nagtawanan sila.
Sinabi raw ni Richard na medyo naalangan daw siyang mag-show dahil hindi niya alam na may mga GROs sa venue. Apparently, napagkamalan niyang GRO ang mga waitress at attendants.
Masamang-masama ang loob ni Rufa Mi sa ginawa ni Richard. Hanggang ngayon kasi ay hindi pa niya makalimutan ito.
Hindi namin lubos-maisip na magagawa ito ni Richard. Napakaganda ng breeding ng singer at wala sa hitsura niya ang mambabastos ng isang kasama sa show. Wala kaming ni isang insidente na narinig na nambastos si Richard ng isang performer.
Anyway, bukas ang pahinang ito sa anumang paliwanag ni Richard.
BLIND ITEM: FOR this actress, it’s not all about money.
Imagine, tinanggihan daw niya ang offer ng isang pulitiko na ikampanya niya.
Hindi birong pera ang tinanggihan ng aktres, napakalaki nito at talagang nakalulula.
Ang offer daw kasi sa aktres ay tumataginting na P40 million. Yes, iyan ang offer ng isang pulitikong ubod ng yaman sa aktres na sikat na sikat pa rin naman hanggang ngayon.
Ang kaso, mukhang may paninindigan talaga ang aktres. Hindi raw nito tinanggap ang offer ng pulitiko. Maprinsipyo kasi siya at hindi lahat ay pera ang labanan para sa kanya.
Bilib naman kami sa aktres na ito. Imagine, inayawan niya ang offer of a lifetime na maaaring hindi na dumating sa kanya o kung dumating man ay siguradong matatagalan pa. Hindi birong halaga ang pinakawalan niya.
Ang aktres ay dati nang nag-endorse ng isang pulitiko ilang eleksyon na ang nakalilipas. Ang pulitiko naman na nag-offer sa kanya ng napakalaking halaga ay isa sa pinakamayamang pulitiko sa ating bansa.
NAG-COLLAPSE SI VICE Ganda dahil daw sa stress.
Bago ito, medyo napaso pa yata si Vice Ganda sa ilaw na props ng Showtime nang minsan siyang mag-perform. Isinugod sa hospital ang hitad at ngayon ay maayos na ang lahat.
Malayo na ang narating ng stand-up comedian na ito. Hindi na simpleng comedy bars ang kanyang nilalabasan. Kagagaling nga lang niya sa Canada for a show. At may movie na rin siya, ang remake ng classic Roderick Paulate comedy na Petrang Kabayo.
Add to this, meron din siyang concert sa Araneta Coliseum sa May.
Tunay ngang malayo na ang narating ni Vice Ganda. Kaya siguro marami ang naiiinggit sa kanya ngayon. Ang kaso, hindi naman naaapektuhan ang hitad sa mga paninira sa kanya. Deadma lang siya sa lahat ng kontrobersiya na ipinupukol sa kanya. Hinog na nga siya kaya naman pinupukol siya.
Lex Chika
by Alex Valentine Brosas
