BLIND ITEM: NAGTANUNG-TANONG ako tungkol sa background ng isang sikat na male celebrity, bagama’t isang negosyante at pulitiko ay may kunek din sa showbiz. Ngunit sa kolum kong ito’y ayoko nang pakialaman ang matinding kasong kanyang kinakaharap, maging ang ugat nito’y ipauubaya ko na lang sa inyo.
Sa isang young actress, na kamakailan ay napansin din ang husay sa pag-arte sa isang taunang film festival, iniuugnay ang ating bida. Bagama’t wala naman silang direktang pag-amin ng kanilang relasyon, apektado ang aktres sa kasalukuyang problema ng kanyang umano’y katipan. Naging “shoulder to cry on” pa nga niya ang isang male TV host, huling-huli ng camera ng isang daily talk show ang walang-dialogue na paghinga niya sa kanyang damdamin.
Pero sadya yatang lapitin ng mga binatang ama ang aktres na ito. Bago kasi pumasok sa eksena ang ating bida, nakarelasyon ng young actress ang isang batam-batang aktor (anak ng isang sikat na aktor-pulitiko) na bagama’t walang legal na sabit ay nagkaanak sa isang batam-bata ring babae, na anak ng isang laos nang bold star.
Heto ngayon ang extent ng aming imbestigasyon tungkol sa kanyang present rumored boyfriend. May naanakan daw ito na dati niyang nobya, matagal-tagal din daw ang kanilang relasyon. Pero nang magsilang na raw ang babae ay iniwan na siya ng ating bida. Maimpluwensiya, may-kaya at hindi basta-basta ang subject ng aking blind item, but this is the least I can write about him, hindi ang mas nakatatakot pang katotohanang aking natuklasan sa likod ng kanyang mabigat na dalahin ngayon.
HINDI NAGING HANDLANG ang malakas na ulan na bumuhos noong Linggo upang hindi dagsain ng mahigit isang libong teen showbiz hopefuls ang first leg ng auditions para sa Star Factor ng TV5 sa Mall of Asia.
Sila ang mga kabataang nangangarap na mapabilang sa unang batch ng homegrown stars ng naturang istasyon, kung saan marami sa kanila ay kinakitaan ng star potential. Sayang, hindi kasamang magdya-judge si Alfie Lorenzo, himself an artist manager who has an eye for talent at may kolum na “Star Nga Ba?” at “Star Nga Siguro”!
Kaabang-abang din ang magaganap na next auditions sa Event Center sa SM Davao on August 1 at sa Event Center naman ng SM Cebu on August 7. Ang mga magsisikilatis kung may “K” nga ba ang showbiz aspirants na ito ay pinangungunahan nina Audie Gemora, Direk Joey Reyes, photographer Raymond Isaac, Ryan Cayabyab at Annabelle Rama. Ang pagsasaere ng Star Factor is hosted by Ruffa Gutierrez.
Raymond Gutierrez ng Starstruck, ano’ng sey mo?
Samantala, saving the best for last ang patapos nang month-long birthday celebration ni Tito Dolphy on Pidol’s Wonderland on TV5 this Sunday, dahil panauhin ng Hari ng Komedya ang kanyang kakontemporaryo’t matalik na kaibigang si Ms. Susan Roces. Yes, the King meets the Queen (of Philippine Movies) in yet another enchanting and spellbinding episode of Pidol’s Wonderland, 6:30-7:30 p.m.
Pepperoni
by Ronnie Carrasco III
