DEADMA NA LANG ngayon si John Lloyd Cruz kesehodang palagi pa ring pinapansin ang tungkol sa kanyang pag-inom ng alak. Inamin naman niya na normal lang naman sa isang lalaki ang uminom, lalo na kung may okasyon. Ipinagtataka niya kung bakit parang mortal na kasalanan ang kanyang ginawa, dahil lang sa marami ang nagpapatunay na talagang tumitikim nga siya ng alak. Ang mahalaga rito, wala naman siyang nabibitin na trabaho.
Nakapagsalita na si John Lloyd tungkol sa kanyang lovelife. Pero ang tungkol sa pag-inom niya ng alak, hindi pa rin siya tinatantanan ng kanyang mga detractors hanggang ngayon. Binabatikos na nga, na kahit napakapropesyunal niyang magtrabaho, lagi pa ring nasa sistema ni Lloydie na tumikim muna ng beer bilang pampagana. Dahil umano’y mas mahusay siyang umarte kapag mayroon siyang talab ng alkohol.
Marami siyempre ang naba-bother dahil sa sobrang hilig daw ngayon ni John Lloyd sa alak. Kahit naman hindi nito napapabayaan ang kanyang iniingatang trabaho bilang artista, nagmamarka naman daw sa hitsura nito. Lagi kasing haggard ang dating ng kanyang kaguwapuhan, kaya dapat daw ay maghinay-hinay naman ang actor.
PINATUTUNAYAN NAMAN LAGI ni Derek Ramsay kung gaano niya kamahal ang kanyang girlfriend na si Angelica Panganiban.
Iniwasan na niya na makapagbigay pa siya ng mga pahayag tungkol sa naging hidwaan noon ng kanyang karelasyon, at sa kanyang leading lady sa teleseryeng Magkaribal ng ABS-CBN, na siyempre pa’y ang laging nagpapakontrobersiyal na si Gretchen Barretto. Damay kasi siya sa nasabing isyu, at maiipit siya talaga sa gitna, dahil siya ang kabiruan ni Greta bago lumala ang isyu at ipinag-react ni Angelica.
Lagi ring inililigtas ni Derek ang kanilang relasyon. Bago dumating sa kanyang buhay si Angelica, napakarami talaga niyang kaibigang mga babae, na kung tutuusin nga ay mas maganda pa kesa kay Angelica, at nagseselos din naman siyempre ang magaling na young actress. Pero dumidistansiya rin naman si Derek sa ibang babae kung kinakailangan, para hindi nagseselos ang tunay niyang karelasyon. Matahimik daw magselos si Angelica, pero palaban kapag napuno na sa sitwasyon.
Hindi nagugustuhan ni Derek ang ibinibintang kay Angelica, na kayamanan lang ng pamilya nila ang isa sa mga tinitingnan ng dalaga. Hindi kumportable si Derek na pag-usapan ang tungkol sa kayamanan nila. Nagkataon lang daw pinagbigyan nila si Korina Sanchez, at naipalabas sa Rated K ang kabuuan ng kanilang magarang bahay, at magmula raw noon, kinakantiyawan na siya, na rich pala ang kanilang pamilya.
ChorBA!
by Melchor Bautista
