KAISTUPIDUHANG MAITUTURING para kay Heart Evangelista ang balitang nagkaroon sila ng ugnayan ng kontrobersiyal TV host na si DJ Mo. Ayon sa dalaga, totoong dumating ang puntong naging magkaibigan sila ni Mo Twister, pero never daw humantong sa isang relasyon ang kanilang samahan.
Usap usapan kasing tulad daw ni Rhian Ramos, naging kasintahan ni DJ Mo itong si Heart at may dapat ding katakutan sa posibleng pasabog na gawin laban sa kanya si DJ Mo. Ayon kay Heart, wala siyang dapat katakutan dahil una at higit sa lahat, wala siyang isyung puwedeng pasabugin ni DJ Mo dahil lantad naman sa showbiz ang kanyang buhay.
Sa kabuuan, sinabi ni Heart na hindi siya nakikialam sa relasyong Rhian at DJ Mo at wala siya sa posisyon para magbigay komento. Pero sa totoo lang, nakararamdam siya nang matinding awa kay Rhian nang ipangalandakan ng aktor kung ano ang namagitan sa kanila ng aktres. Kaistupiduhan daw ang maisyu kay DJ Mo.
Aray ko! Tiyak na magre-react si DJ M. Si DJ Mo pa…
NAKAUSAP KO si Governor Chavit Singson. Isa kami sa showbiz reporter na ipinatawag niya para sa isang simpleng salo-salo sa kanilang bahay sa Corinthian Gardens.
Noong una, walang tuwid na paksa ang naging takbo ng aming kuwentuhan ni Gov. Singson dahil ang salo-salong iyon ay kumustahan lang daw. Naging paksa namin ang nangyari kina Piolo Pascual at KC Concepcion, kay Rhian Ramos at DJ Mo. Ang pelikulang Panday, ang Asiong Salonga at maging ang Enteng ng Ina Mo. Kumbaga, wala lang, showbiz lang.
Walang pormal na interview sana ang magaganap dahil iwas si Gov. Singson, subalit hindi ako pumayag na walang intrigang showbiz. At du’n na nga pumasok ang isyung paglabas ni Congressman Ronald Singson sa piitan, kung saan ay susunduin daw ng sexy actress na si Lovi Poe na balitang girlfriend ng kongresista.
Ayon kay Gov. Singson, kumpirmadong sa January 14 ang pagbabalik-Pilipinas ng kanyang anak matapos na ito ay makulong sa Hong Kong. Pero ayon sa politician, wala sa planong sumundo si Lovi dahil siya at ang ilan nilang kaanak ang magtutungo sa Hong Kong, at mula roon ay tutuloy na sila sa Vigan ng kanyang anak.
Hindi naman daw tutol si Gov. Singson kung maisipang magpakasal ng anak kay Lovi dahil mabait naman daw ang aktres sa kanilang pamilya at sa katunayan ay dumalaw pa raw ang aktres sa Hong Kong noong November para sa kaarawan ni Ronald.
Sabi pa ng aming kausap, never daw siyang hahadlang sa kung ano ang magiging desisyon at plano nina Ronald at Lovi sa kanilang relasyon. Kung magpapakasal, eh ‘di, go! Susuportahan na lang daw niya.
HINDI NA raw tuloy ang programang pagsasamahan nina KC Concepcion, Angelica Panganiban at Gretchen Barretto.
Ang usap-usapan, si Gretchen daw ang tunay na dahilan kung bakit hindi ito natuloy.
“Kay KC, problemado rin ang staff ng Alta, kasi ‘yung schedule. Masyadong hectic ang schedule ni KC,” pahayag iyon ng aming kausap.
Sa kabilang banda, may ilang commercial daw ang umurong na kunin si KC na mag-endorse ng kanilang produkto dahil sa kontrobersiyang ginawa nila sa kanilang relasyon ni Piolo Pascual.
Hindi lang si KC ang nagkaproblema sa commercial. Maging si Piolo rin daw ay nabawasan ang iniendorso dahil may ilang kapitalista ang hindi natuwa sa gender issue ng binata.
Sa kabilang banda, ang pagiging sobrang ikli raw ng buhok ni KC ngayon ay resulta daw nang rebelyon ng dalaga sa naunsiyami nilang relasyon ni Piolo.
More Luck
by Morly Alinio
