AYAW NANG PATULAN ni Sen. Bong Revilla Jr. ang mga patutsada ni Hayden Kho nang magpa-interview ito kay DJ Mo Twister sa Paparazzi nu’ng Linggo.
Tinawag niyang narrow-minded si Sen. Bong pagkatapos lumabas ang interview nito tungkol sa pagkakaroon ng bagong negosyo ni Hayden na isang line ng pabango.
Ang kuwento sa amin ni Bong, na-interview lang siya sa Senate at hiningan ng reaksiyon tungkol sa muling pamamayagpag ni Hayden at pagkakaroon pa nito ng Hayden perfume na kalu-launch lang.
Ang sagot lang naman ni Bong na lahat ay may karapatan na makapag-move on pagkatapos nitong magkamali. Pero sana huwag naman daw kalimutan ng mga tao ang nagawang kasalanan ni Hayden na hanggang ngayon ay dinidinig pa ang kaso sa korte.
Ang dali kasing makalimot ng mga tao, kaya gusto lang ipaalala ni Sen. Bong na hindi pa tapos ang kaso ni Hayden at hindi pa nito napagbabayaran ang pambabastos na ginawa niya sa ilang kababaihan na na-video niya.
Si Katrina Halili lang naman ang matapang na humarap at itinuloy ang pagsampa ng kaso at
hindi pa ito napagbabayaran ni Hayden. Kaya okay lang kung gusto nitong magnegosyo. Pero ‘yun na nga ang sabi ni Bong na sana huwag kalimutan ang nagawa nito sa ilang kababaihan.
Nang lumabas nga ang interbyung ‘yun ni Bong, kung anu-ano na ang ipinaglalagay ni Hayden sa Twitter account niya.
Hanggang ngayon kung anu-ano pang mga pinagsasabi niya laban kay Bong.
Nasabi na ni Bong ang gusto niyang iparating sa mga tao, ayaw na niyang patulan ang mga pinagsasabi ni Hayden.
Tingnan na lang natin matapos ang kaso nito at kung ano ang kahihinatnan nito.
Tingnan na rin natin kung lalago nga ang negosyo nitong pabango. Ayaw ni Joel Cruz ng ganyan!
ANG ISA PANG ayaw na ring patulan pa at lumaki pa ang isyu ay si Aga Muhlach na obvious napahiya sa ipinakitang pagmamaasim ni Sharon Cuneta sa nakaraang concert ni Ai-Ai delas Alas.
Kahit si Charlene Gonzales ay tahimik na rin at hindi na nga ito napag-usapan sa The Buzz nu’ng Linggo.
Mabuting tahimik na lang daw at huwag nang patulan, sabi ni Manay Ethel. Ang dami namang nag-react at hindi nagustuhan ang ginawa ni Sharon kaya tumahimik na lang si Aga.
Marami namang pumuri sa pagiging gentleman ni Aga dahil talagang tinapos pa nito ang concert at hindi ito nag-walk-out kahit napahiya ito sa ipinakita ni Sharon.
Ang ending tuloy, itong si Sharon lang ang hindi gaanong napalakpakan ng mga manonood. Hindi kagaya ng ibang guests na sina Regine Velasquez, Lea Salonga at Boyet de Leon, na mas malakas ang hiyawan at gustung-gusto ng mga fans na kumanta uli.
Sa halip na megastar ang tawag sa kanya, naging “mega-negastar” tuloy!
Inilabas naman ni Ricky Lo ang side ni Sharon at sinabi nitong joke lang daw ‘yun. Pero inamin niyang nagkaroon talaga siya ng sama ng loob nang tumanggi ang aktor na makasama siya sa isang project.
Mga Mata ni Lolita
by Lolit Solis
