AYAN, BINULABOG NI Aleng Irene Kho ang kuta ng langgam, paano nila ngayon pipigilan ang pangangagat ni Manay Lolit Solis? Pinagdarasal pa ni Aleng Irene si Manay Lolit sa hawak nitong krus, ano ngayon ang ibinalik sa kanila ng manager-TV host?
‘Di nabuyangyang pati ang pangungutang ng pamilya ni Dr. Hayden Kho kay Dra. Vicki Belo? Tumataginting na apat na milyong piso pala ang inutang ng pamilya sa doktora nu’ng bubot pa ang relasyon ng dalawa. ‘Yun pala ang dahilan kung bakit hindi idinadamay ni Aleng Irene sa kanyang galit ang doktora?
Pero ito namang si Aleng Vicki nu’ng tanungin tungkol sa pagsusustento kay Dr. Hayden, pinabulaanan pa ang rebelasyon ni Manay Lolit na sinusustentuhan nito ang doktor buwan-buwan, pa-condominium pa at ipinagsi-shopping pa.
“Nakakahiya naman sa family ni Hayden ‘yun, it’s not true,” pa-girl pang sagot ng makasaysayang doktora.
Natural, ganu’n na lang siguro ang naapuhap na katuwiran ni Aling Vicki, kaysa nga naman matatakang matrona ang doktora, ‘di kunwari na lang, walang katotohanan ang sustento isyu na pinalutang ni Manay Lolit.
Pero sa pagitan naman nina Aling Vicki at Manay Lolit, kung dadaanin sa botohan ngayon ang labanan, mabobokya sa boto si Dra. Vicki Belo at kakabugin ito ni Manay Lolit.
At walang kagatul-gatol na sinabi rin ni Manay Lolit na nu’ng nakaraang Oktubre, may napatay na pasyente si Dr. Hayden Kho. Nagpa-liposuction ang pasyente, nalagay sa alanganin ang kundisyon nito, hanggang sa bawian ng buhay.
Natural, maliit lang naman ang mundo ng mga doktor, nu’ng may magpapa-lipo na naman sa klinika ni Dra. Belo at si Dr. Hayden ang itinotoka sa pasyente, nagulantang ang lahat sa sinabi nito.
“Ah, ikaw ba ‘yun? Ikaw pala ang killer doctor!” Sabi ng pasyente. Pero ang kasunod na tanong ng bayan sa rebelasyon ni Manay Lolit, ano na nga ba ang pinakahuling balita tungkol sa pamilya ng namatayan?
Nu’ng nasa DZMM pa kami, nakakatanggap kami ng impormasyon tungkol du’n dahil kakilala ng isang kasamahan namin ang asawa ng namatay. Ano na ba ang kinauwian ng kasong ‘yun?
Mas tama kayang “Magkano?” ang salitang gamitin natin ngayon sa ating pagtatanong?
SANA’Y MASUNDAN AGAD ang ginawang imbestigasyon ng Senado kina Dr. Hayden Kho at Katrina Halili. Kahit paano’y lumilinaw na ang larawan ngayon ng isyu, kundi nga lang inilihis ni Senadora Jamby Madrigal ang daloy ng imbestigasyon, ‘di sana’y malayu-layo pa ang inabot nito.
Nasa kainitan na ang kuwento tungkol sa mga sex videos na patagong kinunan ni Dr. Hayden, pero nu’ng sabihin ng doktor na pinainom ito ng droga ni Katrina, mas naging interesado si Senadora Jamby kung sino ang malaking “isda” na diumano’y nagrarasyon ng droga sa kampo ng dalaga.
Maraming nairita ru’n. Bakit nga naman mas mukhang interesado pa ang senadora sa supplier ng droga? Samantalang ang sentrong paksa ng imbestigasyon ay kung sino ang nag-record ng sex video at kung sino ang naglabas nu’n sa mekado.
Nag-isip tuloy ang mga nakatutok sa imbestigasyon, sadya bang inililihis ni Senator Jamby ang paksa, kaibigan ba nito ang pamilya ni Dr. Hayden o kaibigan ng mambabatas ang mga abogado ng inaakusahang doktor?
Magbuo na lang sana ng panibagong grupo si Senator Jamby para tutukan ang imbestigasyon tungkol sa diumano’y pinagkukunan ng droga ng kampo ni Katrina ayon sa kuwento ni Dr. Hayden Kho.
Huwag nang isabay pa ‘yun sa pagkalkal nila sa kung sino talaga ang utak sa pagbuo at pagkakalat ng mga sex videos sa pamilihan, nakagugulo ‘yun sa daloy ng imbestigasyon. Pinagugulo ni Senador Jamby Madrigal.
Sa totoong-totoo lang.
Cristy Per Minute
by Cristy Fermin
