LIHIM NA pinag-uusapan, pero si Senator Francis “Kiko” Pangilinan diumano ang isa sa mga unang itinuturong dahilan kung bakit sa ngayon ay hindi pa matutuloy ang matagal nang planong balik-tambalan sa pelikula nina Sharon Cuneta at Gabby Concepcion. Parang kung ang pagiging husband daw ng Megastar ang tutukuyin, hindi umano kumbinsido ang mabait na Senador sa muling pagtatambal ng mommy’t daddy ni KC Concepcion.
Marami na ang kabado at nalulungkot kung hindi na talaga matutuloy ang nasabing project. Kasi nga, kung totoong hindi pabor si Senator Kiko sa nasabing balik-tambalan, hindi talaga pupuwedeng alisin ang karapatang iyon, dahil asawa siya. Si Sharon din naman ang tipo ng tao at artista, na kung ang isang bagay na kanyang gagawin ay pagmumulan lang ng intriga at mga gusot ay hindi na lang niya iyon itutuloy. Mas mahalaga para kay Shawie ang katahimikan ng kanyang pamilya.
Samantala, si Gabby naman ay napagbibintangan na kaya hindi pa rin kumbinsido na matuloy ang tambalan nila ni Sharon ay dahil sa isyung mas mataas kumpara sa kanya ang talent fee na tatanggapin ng Megastar, samantalang magkapareha naman sila. Hindi raw maiaalis kay Gabo ang karapatang iyon, dahil kilala siyang masinop sa pera. Kaya lang, hanggang ngayon ay mas malaking artista pa rin si Sharon kumpara sa kanya, na sumunod sa kasikatan nina Nora Aunor at Vilma Santos kaya mataas pa rin ang talent fee.
ANG ISA sa magandang ugali ni Gerald Anderson bukod sa mapagmahal siya sa kanyang pamilya, ‘yung siya mismo ay inilalapit niya ang kanyang sarili sa mga taong gusto niyang pakisamahan. Kahit sikat na si Gerald, hindi siya mayabang. Hanggang ngayon, hindi siya makapagsalita, umiiling at napapangiti lang kapag pinuri mo siya na sikat na sikat na siya. Kasi nga, siya ‘yung hindi naaapektuhan ng kasikatan niya.
Maganda ang friendship na namamagitan ngayon kina Gerald at Sarah Geronimo. Pero ang lamang na pag-uugali ni Gerald sa dating boyfriend ni Sarah na si Rayver Cruz, hindi naduduwag si Gerald sa mga nababalitaan niya, na mahirap daw pakisamahan ang mga magulang ng pop princess. Naka-iskor si Gerald sa usaping iyon, dahil habang nagkakasama sila sa trabaho ni Sarah, pinakikisamahan din niya ang pamilya ng dalaga. Ang resulta, walang nasasabing masama tungkol sa kanya ang mga magulang ng singer-actress.
Ang dapat na lang paghandaan ni Sarah kung sakaling mauwi sa relasyon ang closeness nila ni Gerald, ang maraming selos na pupuwede niyang maramdaman. Hindi lang kasi madaldal si Gerald, dahil may pagkamahiyain pa siya. Pero sa totoo lang, sobra siyang lapitin ng mga babae. Si Gerald ang pinakamalapit na lalaki ngayon kay Sarah, kaya nakamasid na sa kanila ang marami at ang pag-amin na lang nila ang hinihintay sa ngayon.
ChorBA!
by Melchor Bautista
