NABALITA NA NOONG nakaraang taon ang pambubugbog umano ni Benjie Mendez, drummer/ vocalist ng bandang Southborder sa kanyang girlfriend na si Jackie Rivas, miyembro ng Sexbomb Dancers.
Nitong Sabado ng umaga, nakatanggap kami ng text mula sa isang concerned citizen. Ayon sa source na ayaw magpabanggit ng pangalan, may naganap na komosyon umano sa condominium na kanilang tinitirhan sa Quezon City, bandang alas-dos ng madaling-araw noong Sabado. Sa nasabing condo nakatira sina Jackie at Benjie.
Ayon sa kuwento ng aming source, “Jackie ran out of the building barefoot screaming for her life saying she’d call the police. Benjie tried to run after her but Jackie ran fast and got in a taxi in no time.”
Nauna rito, sinipa umano ni Benjie ang alagang chihuahua ni Jackie, kung saan tumilapon ang aso, na naging simula ang pag-aaway ng dalawa sa lobby ng condo hanggang sa loob ng kanilang kuwarto. Hanggang sa makita na lang nila na nagtatakbo na palabas ng kuwarto si Jackie.
Bago lang daw ang magkasintahan sa condo, mga dalawang buwan pa lang daw, at mababait naman daw na kapitbahay. Nadistorbo lang daw sila sa nangyaring kaguluhan nito nga lang Sabado ng madaling-araw. Pinuntuhan na rin daw ng dalawang pulis ang unit ng dalawa para mag-inspeksiyon, pero hindi na raw kasama ng mga ito si Jackie.
Ayon pa raw sa kuwento ng guwardiya sa nasabing condo, humahangos daw palabas ng condo si Jackie at nagtatakbo papunta sa side ng Cabalen Restaurant, pero madilim sa lugar kaya tumakbo ito papunta sa kabilang side.
“Naabutan siya ni Benjie, hinablot ‘yung buhok pataas ng unit and sinuntok sa tagiliran. She was able to run out again and about to ride a taxi nang naabutan ulit siya and nakita ng guard na hinila ulit s’ya.”
Sa pangatlong pagkakataon, wala nang sapin sa paang tumakbo palabas ng condo si Jackie hanggang sa makakuha ng taxi. ‘Di na raw ito naabutan ni Benjie na nang lumabas ay walang suot na T-shirt.
Ayon pa sa aming source, nag-aalala raw sila para kay Jackie at sana raw ay maprotektahan ito.
Nais lang din daw ng mga nakatira sa condo na lumipat na sana ng ibang tirahan sina Jackie at Benjie. Tahimik daw ang kanilang condo, at hindi nila kailangan ang ganoong uri ng kaguluhan.
Bilang pangwakas, nasabi na lang ng aming source ang ganitong linya: “It’s scary to have such violent neighbor.”
Parazzi Chikka
Parazzi News Service
