MALAKING PALAISIPAN SA marami kung totoo bang gagawa ng pelikula, magko-concert at magkakaroon ng primetime serye sa isang malaking TV network ang nag-iisang Superstar na si Nora Aunor, lalo na ngayon at napapabalita na mismong ang pinakamalapit na kaibigan nitong si Kuya German Moreno ang nagsasabing may problema sa pagsasalita si Ate Gay na resulta ng kanyang naging operasyon.
Maaalalang sa mismong radio program ni Kuya Germs sa DZBB kinumpirma nito na malaki ang posibilidad ni Ate Guy na makauwi ngayong 2nd or 3rd week ng Nobyembre, kung saan may mga proyekto itong gagawin sa bansa.
Pero ang tanong: Papa’no nga namang makagagawa ng pelikula or sariling soap si Ate Guy kung limitado lang ang oras na puwede siyang magsalita dahil pagtagal-tagal ay unti-unti nang nawawala ang boses nito? Kahit nga sa mga nakalipas na concert nito ay ‘di na kinayang makakanta pa ni Ate Guy.
Kaya naman ngayon pa lang, marami-rami na talaga ang nag-aabang kung tuloy nga ang uwi ngayong buwan ni Ate Guy at kung anu-anong proyekto ang gagawin nito, at para malaman na rin kung totoo bang sira na ang boses nito.
BLIND ITEM: SINO naman itong sexy star na naging producer na sinasabing kabit ngayon ng isang mayor sa isang probinsiya? Bongga raw ang nasabing sexy star/ producer dahil daig pa raw nito kung umasta ang tunay na asawa ng mayor.
Tsika nga ng aming source, lagi raw itong napagkikita sa munisipyo ng nasabing bayan at laging nasa loob ng opisina ng mayor. Feeling nga raw nito ay siya ang First Lady ng nasabing bayan, kahit ang katotohanan ay kabit lang siya. Kung makapag-utos daw kasi ito sa mga staff ng naturang mayor ay ganu’n-ganu’n na lang.
Deadma na nga lang daw ang mga staff ni Mayor, dahil may go signal naman ito sa mukhang in love na in love na mayor. Kung sa bagay, sino nga ba namang alagad ni Adan ang hindi mahuhumaling kay sexy star/ producer? Bukod nga raw kasi sa maganda at sexy, magaling daw maglambing at kumarinyo. ‘Yun na!
NAKABABAGBAG-DAMDAMIN AT NAG-IWAN ng aral ang naging kuwento ng buhay ni Shalala sa Paparazzi last Sunday mula sa pagyao noon ng kanyang ina na dalawang linggo nila bago naipalibing dahil sa kawalan ng pera, at ang pagsubok muling dumating sa kanilang pamilya sa pagkakaroon ng sakit ng kanyang pamangkin na siyang sinusuportahan nito.
Maraming manonood ang lumuha at naantig ang puso sa isiniwalat ni Shalala sa pinagdadaanan ng kanyang buhay. Kaya naman sa bawat patak ng luha mula sa kanyang mga mata, siya namang nagsilbing aral sa mga nakapanood.
Tunay ngang blind item queen si Shalala sa mata ng marami, pero ginagawa niya lang ito para kumita, kumita ‘di lang para sa kanyang sarili, kundi para sa kanya at lalung-lalo na sa kanyang pamangkin na may sakit.
Kaya naman saludo kami kay Shalala sa sobrang pagmamahal sa kanyang pamilya. Sabi nga nito, “Kantiin mo na’ng lahat, ‘wag lang ang pamilya ko, lalung-lalo na ang pamangkin kong may sakit,” dahil handa siyang makipag-patayan para sa mga ito.
John’s Point
by John Fontanilla
