NAPAPAGOD NA ba kayo sa kababalita ko tungkol sa away nina Annabelle Rama at Nadia Montenegro?
Hay, naku ‘day! Napapagod na rin ako! Pero hindi ka ba naman maloloka kung napapanood mo sa TV na nagsisigaw si Annabelle sa labas ng Prosecutor’s Office at hinahamon na lumabas si Nadia.
Pero hindi nga lumabas si Nadia, at hinintay na lang na umalis na si Annabelle.
Ngayon, nagsampa na ng kasong Attempted Murder, Grave Coercion at Grave Oral Defamation si Nadia laban kay Annabelle at isinampa niya ito sa San Juan Prosecutor’s Office.
Ayaw nang sagutin pa muna ni Annabelle ang pagdemanda ni Nadia dahil kahit sino naman daw puwedeng magdemanda. Pero ang tanong daw, matatagalan daw ba ito ni Nadia.
“Ako ba hindi sasagot diyan? Akala ba natutulog lang ako basta sa mga dinemanda niya. Humanda siya, dahil inumpisahan niya, ako tatapusin ko,” sagot naman ni Bisaya.
Kaya mahaba-haba pa ang tatakbuhin nitong away nila. Sabi nga nilang dalawa, malabo nang maayos pa ito kaya hintayin na lang natin kung saan hahantong ito.
Lagi naman daw pinagsasabihan ni Annabelle ang mga anak niya na hayaan na lang siya sa laban niya.
Sinasabihan daw niya ang mga anak niya kung masalubong nila si Nadia, batiin nila ito dahil labas naman sila sa away nilang dalawa.
Pero nakikita namang suportado si Annabelle ng mga anak niya, kaya ewan ko na lang kung ano na ang mangyayari rito.
Ang latest pa ngang nabalitaan ko, nakara-ting kay Annabelle, pumirma na raw si Ynna Asistio sa Icon ni Atty. Bebong Muñoz kahit may existing contract pa ito kay Annabelle. Kaya mukhang may naaamoy na naman akong panibagong kaso diyan. Hay, naku! Ang gulu-gulo na nila. Ang nag-i-enjoy lang dito, ang mga reporters at mga showbiz talk show na aligaga sa kaku-cover sa kanila sa hearing.
Abangan n’yo na lang sa Startalk bukas ang exclusive interview namin kay Annabelle at Nadia kaugnay sa panibagong gulo na namang ito.
ENJOY NA enjoy na si Camille Villar sa kanyang hosting job sa Wil Time Bigtime at mukhang tuluy-tuloy na raw siya roon.
Wala naman talagang balak mag-showbiz si Camille pero okay lang daw kung hosting at diyan lang daw sa Wil Time.
Suportado naman ito ni Willie Revillame at natututo na nga si Camille sa hosting kung ikumpara nu’ng nakaraan.
Natutuwa naman ang mga magulang ni Camille na sina Sen. Manny at Cynthia Villar kaya kapag may panahon, dinadalaw nila ito sa studio.
Minsan nga napapansin ko na parang pagod na pagod si Camille, dahil kapag umaga nag-u-opisina pa pala ito, tapos mga alas-tres ng hapon naghahanda na ito para sa pagpasok niya sa Wil Time Bigtime.
Medyo nakasanayan na raw niya ang ganu’ng schedule at na-gi-enjoy naman daw siya.
Mga Mata ni Lolita
by Lolit Solis
