ISA ANG BATIKANG movie director na si Lav Diaz na matagal nang may inihahandang project para kay Nora Aunor. Minsan na ring nakipag-usap si Direk Lav kay Ate Guy para maglam-bing na kung may pagkakataon ay makagawa silang dalawa ng kahit isang pelikula. Pero hanggang ngayon ay wala pa ring linaw ang nasabing mga plano.
Kung puro negatibo ang karamihan sa mga nasusulat ngayon tungkol kay Ate Guy dito sa Pilipinas, si Direk Lav ay may magagandang kuwento naman tungkol sa Superstar. Hindi na isyu sa ibang bansa ang big deal dito sa showbiz natin na si Ate Guy ay nagka-casino. ‘Yon naman kasi ang isa sa mga libangan ng premyadong aktres. Pero ang isa raw sa nakakatuwang ugali ng mommy ni Ian de Leon, hanggang ngayon ay ang kanyang pagiging mahiyain. Hangga’t maaari, ayaw raw ni Nora nang siya ay nakikilala at pinagkakaguluhan ng mga tao roon.
“Kapag may mga fans na nakikilala si Nora at nagre-request na magpa-picture sila, parang si Guy pa ‘yung nahihiya. Gano’n kasimple ang Superstar,” wika ni Direk Lav.
Wala raw duda na talagang sikat na sikat pa rin si Ate Guy sa mga Pinoy sa ibang bansa. Kahit na hindi siya dinudumog ng mga tao, hindi naman nila hinihiwalayan ng sulyap ang aktres. Halata rin daw ng iba nating mga kababayan na parang naiilang ang mommy ni Ian kapag siya ay pinagkakaguluhan ng mga tao. Kaya bilang respeto daw sa privacy ni Aunor, nagkakasya na lang ang ating mga kababayan na sulyapan ang kanilang idolo.
WALA NAMANG ATRASO sa akin si Shalala. Pero parang gusto kong sumang-ayon sa napupuna ng marami na parang may kayabangan na siya ngayon dahil sumisikat na siya dahil marami nga siyang programa sa TV5. Kapansin-pansin din, na parang wala na siyang pakundangan ngayon kung magtaray.
Nu’ng wala pa siyang maraming programa at kilala lang siya dahil sa Walang Tulugan! ni German ‘Kuya Germs’ Moreno sa GMA-7, nakakaaliw ang kasimplehan ni Shalala.
Naalarma lang ako sa sobrang ka-tarayan na wala sa lugar ni Shalala nang minsang sa Juicy ng TV5 ay walang preno siyang mangmaliit ng ibang artista. Ang topic nu’n ay si Alodia Gosiengfiao. Sabi ba naman ni Shalala: “Sino ‘yon?” Kaya sinabi na lang ni Alex Gonzaga na: “Si Alodia ‘yung cosplayer.”
Minsan naman, sina Albie Casiño at Andi Eigenmann ang topic. Patungkol kay Albie, sabi ni Shalala: “Hindi naman pala kilala, huwag na nating pag-usapan!”
Ano ba naman ‘yon? Pina-ngalanan ng Juicy sa kanilang Showbiz feed sina Alodia at Albie, pero hindi naman blind item ay maglilitanya si Shalala ng gano’n? Samantalang ang kailangan naman ay magbigay sila ng opinyon nila tungkol sa balita.
Mas okey pa ‘yung ginagawa nina Cristy Fermin, Mo Twister at Alex, na kung hindi nila talaga kilala ang mga artistang pinag-uusapan, wala na lang silang reaksiyon kundi uminom ng kape na nasa kanilang table.
Kapag ganyan si Shalala, parang nakakailang na siyang lapitan, batiin at kausapin. Maangas at astig na kasi ang dating niya. Nawala na ang kanyang kasimplehan.
ChorBA!
by Melchor Bautista
