PERFECT ANG TANDEM nina Willie Revillame at Shalani Soledad sa programang Willing Willie ng TV5. Mabilis silang tinanggap ng publiko, may kilig factor naman kasi ang dalawa. Nagkaroon agad sila ng hukbo ng tagahanga at binuo nila ang Will-Shalani Fans Club.
Very vocal si Willie sa pagsasabing inspirasyon niya ngayon ang Konsehala ng Velenzuela City. Maligaya siya tuwing nasisilayan niya ang dalaga. Kapansin-pansin din ang madalas na pagpapalipad-hangin ng controversial TV host sa tunay niyang nararamdaman kay Shalani.
Maging ang entertainment press, aliw na aliw sa loob ng studio habang pinanonood ang dalawa, pati ang audience kinikilig kapag nag-umpisa nang biruin ni Willie si Shalani.
Nagtanong si Cristy Fermin na kasalukuyang nanonood sa loob ng studio. “Gaano mo kamahal si Shalani?”
“Hindi sinasabi ‘yun, nasa puso’t isipan ‘yun. Siya ang iniisip mo kapag natutulog ka sa gabi. Hindi pa ako ready sa ngayon dahil marami pa akong obligasyon na dapat kong gawin. Kapag ready na ako saka ko siya yayayain… Si Shalani, inii-ngatan ‘yan…” simple pero malaman ang bitiwang salita ni Willie.
Obvious namang masaya’t maligaya si Shalani sa pagiging co-host ni Willie. May nagsasabing sila na nga raw ng TV host dahil alluring ngayon ang ganda ng dalaga. Sinasabing may MU (mutual understanding) na raw ang dalawa. Pinabulaanan naman ito ni Shalani. Masaya raw siya sa ginawa niya at ini-enjoy ang pagiging co-host ni Willie.
Nakapag-adjust na nga si Shalani, nakikipagbiruan na ito sa controversial TV host.
“Kung sakaling mag-propose ako, tatanggapin mo?” Seryosong tanong ni Willie pero deadma lang nga ito. Binaling na lang ni Shalani sa mga contestant ang sagot sa tanong ni Willie.
Pilit pa ring binibigyang-kulay ang magandang pagti-tinginan nina Willie at Shalani as friends. Wala pa raw talagang namamagitan sa kanila, pagdidiin ng Konsehala. “I think Willie naman po has always been that way. Mabiro po talaga si Willie. And we enjoy what we do. We’re very happy sa trabaho po namin.”
Gamay na nila ngayon ang isa’t isa kaya mabilis na nakapag-adjust si Shalani. Para sa kanya, everyday is always an adjustment process. Palagi raw may bagong development kang nadi-discover everyday.
“First Lady ng Primetime” ang tawag ngayon kay Ms. Shalani Soledad. Hindi niya inilalagay sa isipan niya ang title na ibinigay sa kanya ng media. “Wala po ‘yun sa akin. Basta ang gusto lang namin ay mapaganda ‘yung show at mag-enjoy ang publiko.”
Hinulaan sina Willie at Shalani na magkakatuluyan raw sila sa taong ito. At kung sakaling magiging seryoso si WR sa kanyang co-host malamang raw na pakasalan niya ito. Magiging maganda ang takbo ng political career ni Willie kung sakaling papasukin niya ang pulitika sa tulong ni Shalani. “Hindi mo rin masa-sabi… When it happens, siguro it happens. You just hope sana maging masaya at sana maging okey…”
Sa totoo lang, halos lahat yata ng malalapit na kaibigan ni Willie boto kay Shalani. Pinagdarasal nila na sana this time, for good na ang magiging karelasyon ng kanilang idolo.Kulang na lang nga na sila na mismo ang manligaw sa magugustuhan ng kanilang mahal na kaibigan. Kung dumating kaya ‘yung time na seryoso, as in, na ligawan ka ni Willie, may pag-asa kaya ?
“As far as chances po, mahirap talagang magsabi ng chances. Basta what we can say po… as for me, I am just really enjoying what I do,” simpleng sagot ni Ms. Shalani Soledad.
AYAW Paawat!
by Eddie Littlefield
