GAANO KATOTOO ANG chikka na hindi umano binayaran ni Sharon Cuneta ang isang catering service sa isang event na ginanap sa house ng Megastar? Pictorial daw iyon para sa Star Power na hino-host ni Sharon noon, at kinuha nga raw ang serbisyo ng Juan Carlo the Caterer para sa catering service. Ang siste nga raw, dahil sa nangyari, hanggang ngayon, hindi sumusuweldo ang mga tauhan ng nasabing catering services na nag-duty noon.
Parang hindi naman kami makapaniwala na magagawa ni Sharon ang hindi magbayad para sa nasabing catering service. Pero ayon sa kuwento ng isang ‘Arneekane Astronomo’ sa kanyang Facebook account, pinsan niya mismo ang nagkuwento sa kanya, na isa sa mga service crew na kasama sa nasabing catering.
Ayon sa post, nagsimula raw ang problema nang aksidenteng mag-apoy ang plastic gloves ng coordinator dahil sa waxgel, at aksidenteng napahawak sa food lighter na may apoy. Kaya naman, dali-daling hinubad ng coordinator ang nagliliyab na plastic gloves at naihagis sa floor na naging sanhi ng pagwang-wang ng fire alarm sa bahay ni Sharon. Kaagad naman daw kumuha ng fire extinguisher si Sharon at agad na pinatay ang ‘napakaliit’ na apoy.
Lumalabas sa kuwento na parang ito ang dahilan kung bakit nagalit si Sharon sa nasabing catering service, at hindi na ito binayaran.
Kung totoo man ang kuwento, aksidenteng maituturing ang nangyari. Hindi rin nga naman gugustuhin ng coordinator na mapaso ang kanyang kamay, ‘di ba?
Ang nakakalungkot nga lang, again kung totoo nga ang kuwento, dahil sa nangyari, napagalitan ng may-ari ng catering service ang kawawang coordinator. Pagkatapos, hindi na nakasuweldo, tinanggal pa raw sa trabaho ang nasabing coordinator.
Siguro naman, may makatuwirang paliwanag ang Megastar kaugnay ng isyung ito. At ito ang aabangan natin…
Danny’s Law
by Danilo Jaime Flores
