SA PICTORIAL ng Pagpag, Siyam na Buhay ay nakausap namin si Shaina Magdayao at agad naming hiningan ng reaksyon sa balitang pagkikita nila ng ex-boyfriend na si John Lloyd Cruz kasama ang girlfriend nitong si Angelica Panganiban sa nakaraang birthday celebration ni Bea Alonzo.
Lumapit daw si John Lloyd kay Shaina at bumati rito. Tinanong si Angelica sa nangyari at para sa aktres ay mas mag-iisip siya nang ‘di maganda kung nakita pa niya na naiilang ang boyfriend sa ex nito.
Sa kuwento naman ni Shaina, okay sila ng ex at nagbabatian naman talaga sila ‘pag nagkikita. Pero nang tanungin kung nakapag-usap pa ba sila, hindi ang isinagot ng aktres dahil pareho silang busy ng gabing iyon dahil nga kaarawan ni Bea.
Agad din naming tinanong sa naging pahayag ni Piolo sa nakaraang interview namin sa aktor na kung magkakaroon siya ng susunod na girlfriend ay si Shaina na ‘yun, ayaw pa ring maniwala tungkol dito ni Shaina dahil ‘di niya napanood mismo ang interview namin kay Piolo. Pero sa sinabing ito ng aktor, natutuwa siya dahil nangangahulugan lamang ito na may nakikitang maganda o mabuti sa kanya si Piolo.
Consitent pa rin si Shaina sa pagsasabing hanggang sa ngayon ay wala pa rin siyang lovelife at mas gusto niya ay magpokus muna sa kanyang career lalo’t ngayon nangyari na hindi talaga siya nababakante sa sunud-sunod na mga trabaho.
Sa kabila nito, may ilang reliable sources talaga ang nagsasabi sa amin na matagal na raw ang relasyong Shaina at Piolo at tinatago na lang ito para iwas-intriga na rin at kontrobersiya, kung saan high profile ang mga nakaraang relasyon nila at talagang pinagpiyestahan ng publiko.
Kaarawan noong nakaraang November 6 na kung dati ay nasa ibang bansa si Shaina, ngayong taong ay ‘di siya makalabas ng bansa dahil sa dami ng kanyang mga trabaho. Sa ngayon, wala nang mahihiling pa si Shaina kundi ang lalo pang gumanda ang kanyang career, kung saan sobra-sobra ang pasasalamat niya sa ABS-CBN at Star Cinema sa sunud-sunod niyang mga trabaho.
SA SUNUD-SUNOD na break-ups ngayon sa showbizness, tinanong namin si Toni Gonzaga kundi ba siya natatakot na baka dumaan din sa ganitong pagsubok ang relasyon nila ni Direk Paul Soriano?
Sinagot naman kami ng TV host/actress na sa pitong taon nilang relasyon ng boyfriend, marami na silang napagdaanan at masasabi niyang matatag na sila at kung anuman ang mangyari, alam niya na kagustuhan ito ng Diyos.
Sa isang interview namin kay Piolo Pascual, inamin ng aktor na nanligaw siya dati kay Toni pero hindi nga lang ito nautloy dahil pareho silang busy ng mga panahong iyon. Noong una ay ayaw magsalita tungkol dito ni Toni dahil siyam o sampung taon na ito nang nangyari at ayaw ni Piolo na pag-usapan ito dati. Pero nang sabihin namin na nanggaling naman ito mismo kay Piolo, kahit kaunti ay nagsalita na rin ang aktres.
Bago pa lang siya nu’ng lipat sa ABS at wala pa siyang kaalam-alam sa mga pasikut-sikot doon. Ayon kay Toni, ‘di niya rin kasi maisip na maging boyfriend noon ang isang tulad ni Piolo na sikat na sikat at heartthrob talaga. Para sa kanya, kakapalan sa parte niya kung magiging boyfriend niya ito. Ang mga sikat na artista noon ay inilalagay lang sa pedestal ni Toni na gusto lang niyang tingnan at naniniwala siya na mawawala ang misteryo nito ‘pag nanligaw o naging boyfriend na niya.
Kasama si Piolo sa rom-com UNlove You sa ilalim ng direksyon ni Direk Olive Lamasan, ikinuwento ni Toni na ito na ang pinakamahirap na pelikulang nagawa niya kung saan baka ito na rin ang huling rom-com na gawin niya at mag-full drama na lang siya sa susunod dahil pakiramdam niya ay naibigay na niya ang lahat para sa pelikulang ito.
Kapalit ng pagiging host sa The Buzz ay ang sitcom na pagtatambalan nila muli ni John Lloyd Cruz pagkatapos ng tagumpay ng pelikula nilang My Amnesia Girl.
Maiba Lang
By MELBA R. LLANERA
