BIGAY NA BIGAY, kilalang-kilala namin kung sino ang personalidad na nakakubli sa likod ng mga lumalabas na blind items ngayon tungkol sa isyu ng diumano’y paghihirap sa pananalapi.
Ang ibinibigay na dahilan ay ang paghihiwalay nila ng kanyang matagal nang karelasyon na nakaririwasa sa buhay at kilalang-kilala ang pamilya sa larangan ng pagnenegosyo.
Diumano, mula nang magkahiwalay sila ay nakaramdam na ng kakulangan sa pananalapi ang aktres na tinutukoy sa kuwento, hindi na raw niya nasusunod ang kanyang mga luho dahil wala na nga siyang “benefactor.”
Parang lumalabas na sikat man ang aktres na ito ay nakasandal lang siya sa kayamanan ng kanyang dating karelasyon, parang walang maitutulong ang kanyang pagsisikap, hindi pinahahalagahan sa kuwento ang malaki niyang kinikita sa pelikula at telebisyon.
Naging maingat ang aktres sa nakaraan niyang relasyon, iilan lang sa showbiz ang nakakaalam ng tungkol du’n, inosente ang publiko tungkol sa pinagdaanang relasyon ng sikat na aktres.
‘Yun ang itinuturong dahilan ngayon kung bakit bagsak na bagsak ang emosyon ng sikat na aktres, ‘yun din ang sinasabing dahilan kung bakit numipis na ang kanyang wallet, nawala na nga raw kasi ang punumpunong kaban ng yaman ng dati niyang karelasyon.
Kinokontra ng kampo ng sikat na aktres ang isyu, nakaririwasa man daw sa buhay ang dating karelasyon ng aktres ay hindi naman siya umasa nang buong-buo sa kung ano ang meron ito, nagtrabaho pa rin ang aktres at kumita ng sarili niyang pera.
Ang tinutukoy na dating karelasyon ng aktres ay hindi isang lalaki. Tibo ang sangkot sa nakaraang kuwento ng buhay-pag-ibig ng sikat na aktres.
NAGLABAS NA NG pahayag ang mga bossing ni Governor Luis “Chavit” Singson na sa ginawa niyang pagpapasubaybay-pagtiktik sa mga aktibidad ng kanyang karelasyong si Che Tiongson ay wala siyang ginamit na makinarya ng gobyerno.
Hindi raw ginamit ni Governor Singson ang kanyang posisyon bilang Deputy National Security Adviser sa kaso nila ngayon ni Che, isinagawa raw ‘yun ng pulitiko sa kanyang kapasidad bilang ordinayong taong namomoroblema sa kanyang karelasyon, kaya walang dapat panagutan si Governor Chavit, sa gobyerno at sa batas.
Lumawak na nang lumawak ang isyu ng bugbugan ng magkarelasyon, humantong na ‘yun sa korte, nagsasalita na rin ngayon ang mismong anak ni Governor Chavit sa kanyang unang pamilya para sabihing napakasakit ng ginawa ni Che sa kanyang ama.
Spoiled daw si Che kay Governor Chavit, minahal daw nang todo ng gobernador ang babae, kaya bakit pa nakayang lokohin ni Che ang kanyang ama?
Sinabi rin ni Governor Chavit na wala nang pag-asang magkaayos pa sila ni Che, ang unang pagkakamali raw ay masakit na, pero mas masakit ang ikalawa nitong pangangaliwa.
NOVO ECIJANO KAMI, pero mahigit nang dalawang dekadang naninirahan sa Valenzuela City, kaya itinuturing na naming pangalawang tahanan ang siyudad na ito.
Sa pag-iikot namin sa siyudad ay marami kaming naririnig na hindi kagandahang komento tungkol kay Kris Aquino, masyado raw kasing pakialamera ang aktres-TV host sa buhay na personal ng kanyang kapatid na si Senador Noynoy, ang direkta nilang tinutukoy ay ang pagsasabi ni Kris na kailangang manatiling single ang kanyang kapatid.
Natural, taga-Valenzuela ang kasalukuyang girlfriend ni Senador Noynoy na si Konsehal Shalani Soledad, kaya ang mabilisang interpretasyon du’n ng aming mga kababayan ay parang ayaw ni Kris sa karelasyon ng kanyang kuya.
Tanggap na nilang nilangisan ang dila ni Kris, kaya nga hawak niya ang trono bilang “Taklesa Queen,” pero sana naman daw ay huwag nagsasalita ng ganu’n ang aktres-TV host dahil may pamilya, mga kamag-anak at mga tagasuporta rin namang nasasaktan ang girlfriend ni Senador Noynoy.
Nag-sorry na si Kris tungkol du’n, pero parang hindi tanggap ng aming mga kasiyudad ang panghihingi niya ng paumanhin dahil ang kanilang katwiran, “Palagi na lang ba siyang magso-sorry? Gagawa siya ng kapalpakan, tapos, magso-sorry, ganu’n na lang ba palagi ang gagawin ng babaeng ‘yan?”
Kopya.
Cristy Per Minute
by Cristy Fermin
