DAHIL SA TINURAN ni Ms. Consoliza Laguardia ng MTRCB sa mga ginuguwardiyahan nito sa mga palabas sa telebisyon gaya ng Showtime, kung saan nagbigay siya ng komento sa isa sa hosts nito na si Vice Ganda, ito ang isang nausisa kay Vice Ganda sa grand presscon ng pelikulang pinagbibidahan niya, ang Petrang Kabayo.
Diumano, pinag-iingat at binigyan ng tila warning ng nasabing censor ang komed-yante dahil daw sa double-meaning na mga salita o dialogue na pinakaka-walan ito sa ere.
Ang sagot naman ni Vice Ganda, wala naman siyang masamang salitang pinakakawalan sa nasabing programa. Ayon pa sa kanya, ang nag-iisip ng masama ay ‘yung mga tao’ng nakakapakinig sa kanyang sinasabi. At ito ang mga naglalagay ng sari-saring ibig sabihin sa pinakakawalan niyang mga salita.
Naiintindihan daw niya na trabaho ni Ms. Laguardia na i-monitor ang programa nila. Dahil trabaho niya ito. Kaya lang, kung parang ang dating eh, sa kanya o sa programa lang nila ito nakatutok o tumututok, ang magiging dating naman daw nito sa kanya eh, parang siya naman ang pinag-iinitan. Paano naman daw ang ibang obligasyon nito sa ibang programa kung sa kanya na lang ito naka-tutok?
“Simu-la’t sapul, nag-iingat ako talaga sa mga sinasabi ko, lalo na sa TV. Dahil alam ko ang kaibahan nito sa live na sinasalangan ko sa comedy bars noon. Alam ko ring may obligasyon din ako sa mga taong nakikinig sa akin.”
Tinanong din si Vice Ganda kung hindi ba siya natatakot kay Ms. Laguardia?
“Sa Diyos at sa nanay ko lang ako natatakot. At wala naman akong dapat na katakutan sa kanya. Dahil alam kong wala akong ginagawang masama. Hindi ako tanga na alam ko nang mali eh, gagawin ko pa.”
Kung sakali raw na ipatawag siya o imbitahin sa MTRCB office nito?
“Itse-check ko muna sa manager ko ang schedule ko. Aalamin ko muna ang mga schedule ko. If ever hihingi ng dialogue? Aalamin ko muna kung talagang kailangan ito. If ever, bakit naman hindi?”
Not bothered at all?
“Hindi kasi ako partikular sa kanila. Kung sinuman ang nakaupo o sinasabing papalitan o may mag-o-overstay. Para sa akin hindi siya nag-e-exist!”
Ooops, narinig ko ‘atang humalinghing ang kabayo ni Petra!
ANG SABI NAMAN ng head ng pinaka-Star Magic at Artist Center ng TV5 o Talent 5 na si Audie Gemora, hindi naman nag-walk out si Anabelle Rama bilang isa sa mga Council ng Star Factor nang hindi ang ‘manok’ nitong galing ng Cebu ang mapili para manatili at makabilang sa 12 shining stars ng nasabing programa.
Ayon kay Sir Audie, naging emosyonal lang si Anabelle. Dahil alam nila ang istorya ni Gabo na tubong-Misamis at pinapunta ng ina sa Cebu para kumuha ng vocational course doon. Nag-ambag ang pamilya para may gastusin doon ang bagets at pumasok pang kargador ng softdrink cases doon. At nang makita ang oportunidad sa Star Factor eh, sinubukan ang mag-audition at pumasa naman.
Bumalik na nga raw si Anabelle sa kanilang show pero hindi na ito kinailangan pang mag-sorry. Kumbaga, hindi na lang pinag-usapan ang nangyari.
Sabi rin ni Sir Audie, hindi nga madali ang tumanggap ng rejection kaya naman para mas mai-guide o mabantayan ang kanilang mga contestants, nakaantabay na ang isang psychologist at counselor para sila magabayan sa pagtanggap nila, lalo na ng pagkatalo.
Dahil marami rin ang clamor for Gabo na hindi ito agad-agad dapat na natanggal sa “Star Factor” malamang daw na ipasok ito kung sakaling kailanganin ang wild card sa nasabing programa.
“Yun din ang mahirap. Dahil I am part of Talent 5, I cannot vote. Boboto lang ako when I have to break a tie. And we have to be very subjective. Naiintindihan ko where Tita Anabelle’s coming from. Kasi nga, para kaming namimingwit ng mga isda sa dagat at pagkatapos eh, bigla namin silang ibinabalik doon.”
At sa mga susunod na linggo, isa-isa uling malalagas ang 12 finalists na napili na, hanggang sa grand finals nila in December 5, para sa last woman/man standing na magtatamo ng isang milyong piso (tax free), kontrata sa TV5 na worth isang milyon din at house and lot (two-storey with three bedrooms).
The judges have finally spoken! ‘Yun na ‘yun!
The Pillar
by Pilar Mateo
