NAKA-LUNCH KO KAMAKAILAN lang ang may-ari ng Flawless na si Ms. Rubby Sy para magkatsikahan lang.
Kapag may mga isyung napag-uusapan namin, kaagad maglalabas sila ng iPAD nila para mag-check ng kung anong isyung napag-usapan.
Aba, ‘Day! Tiningnan ni Shirley Pizarro ang Facebook niya, na-check niya na meron din pala akong Facebook account doon.
Naloka ako! Hindi nga ako marunong mag-text, magkalkal pa ng computer! Tiningnan ko ‘yung facebook account ko raw. Ang daming nagpadala ng mga message du’n na karamihan naman gustong mag-artista.
Mabuti na lang at nag-post din du’n si Jojo Gabinete na fake ang Facebook account na ‘yun. Kaya siguro, titigil na sila sa kapapadala ng message du’n.
Ang inaalala ko lang, baka mamaya gamitin pa nila ‘yun para mapagkakitaan nila. Baka mamaya harbatan pa ‘yun ng kung sino mang gumawa ng account na ‘yun sa Facebook at pangalan ko ang nagagamit.
Kaya sa mga nagpi-Facebook, huwag na huwag n’yong patulan iyang Facebook account ko kasi hindi po akin ‘yun.
Never akong magka-Facebook kahit iyang Twitter na ‘yan dahil hindi ko talaga type at wala akong panahon ‘no!
Hindi pa nga ako marunong magkalkal ng cellphone ko, iyan pang mga Facebook na ‘yan!
NABANGGIT NA RIN lang iyang Twitter na ‘yan, sa tingin ko talaga, ang laki ng nagagawa ng Twitter na iyan para magkasira-sira ang mga magkakaibigan.
‘Di ba nagkademandahan na sina Cristy Fermin at Chokoleit dahil sa mga naglalabasan sa Twitter account ni Chokoleit?
Ang malaking gulo ngayon, itong away nina Claudine Baretto at Angelica Panganiban na nagsimula rin sa Twitter. Hay, naku! Kaya sinasabi ko sa mga anak-anakan ko, huwag na silang mag-Twitter-Twitter na iyan!
Nananatiling tahimik ngayon si Claudine pagkatapos maglabas ng demand letter ng abogado ni Angelica Panganiban.
Binigyan ito ng palugit na 7 days na kung hindi niya ire-retract ang mga sinabi niya, mapipilitang magsampa ng demanda si Angelica.
Bale ngayong araw na iyang seventh day kaya hinihintay na lang kung itutuloy ba ni Angelica ang pagpa-file ng demanda.
Sinabi naman ni Raymart Santiago na pag-uusapan na nilang magkakaibigan na maayos ito sa mahinahong paraan, kaya sana maayos nga at hindi na umabot sa demandahan.
Nagkaroon ng event si Dra. Vicki Belo nu’ng kamakalawa ng gabi, kung saan pinasinayahan nito ang inayos niyang Cancer Treatment room ng mga batang cancer patients sa Philippine Children Medical Center at isa sa inimbitahan ay si Claudine, pero hindi ito sumipot.
Siguro umiiwas na lang siya sa mga reporter na nandu’n para hindi na siya matanong tungkol sa isyu nila ni Angelica.
Bilang isa sa mga malalapit na kaibigan ni Claudine, nagpahayag si Dra. Belo ng suporta niya sa aktres. Pero hindi pa raw niya ito nakakausap at sadyang itinatago raw muna ni Claudine ang sarili niya, na wala muna siyang makakausap na ibang tao. Kaya nirerespeto muna nila ang pananahimik nito.
Pero sana, maayos na nila ito at hindi na lumaki pa at magkademandahan! Ang nakapanghihinayang daw dito ay ang magandang friendship nila na nasira nang dahil lang sa Twitter na ‘yan, ‘no!
Mga Mata ni Lolita
by Lolit Solis
