MUKHANG MAHIRAP NGA itong pinagdaraanan ngayon ni Willie Revillame sa ABS-CBN dahil nanindigan din ang network na dapat sundin nito ang napirmahang kontrata.
Kaagad silang naglabas ng statement pagkatapos magsalita ni Willie sa presscon nito nu’ng kamakalawa lang na magri-resign na siya sa ABS-CBN.
Paliwanag pa ng abogado niyang si Atty. Leonard de Vera, unilateral decision daw ‘yun. Ang ABS-CBN naman ang unang bumitaw kay Willie dahil sa tinanggal na ang pang-araw-araw na programa nito, kaya tama lang na bumitaw na rin si Willie at tuluyan nang magpaalam bilang Kapamilya talent.
Mukhang kampante naman ang mga abogado ni Willie na malulusutan nila ito kaya abangan na lang daw in two weeks dahil may ia-announce sila kung anong programa at saan lalabas si Willie.
Malaki raw ang posibilidad na sa TV5 ito, pero ayaw pa munang kumpirmahin ito ni Willie dahil inaayos pa nito ang gusot niya sa ABS-CBN.
Sana nga, maayos na ito dahil gusto na rin naman ni Willie na maipagpatuloy ang kanyang programang makapagsilbi sa taumbayan.
MATAAS ANG RATING ng Party Pilipinas nu’ng nakaraang Linggo dahil ‘yung announcement nga nina Ogie Alcasid at Regine Velasquez ang inabangan ng lahat.
Very emotional ang magkasintahan nang kumpirmahin nilang magpapakasal na sila bago matapos ang taong ito. Kaya hindi na rin napigilan ng karamihan na maluha dahil masaya ang lahat sa magandang balitang ito.
Ang sabi na lang ni Ogie, sana ipagpatuloy pa rin ng mga fans at supporters nila ang pagdarasal na maging okay ang lahat, dahil sa ngayon ay inaasikaso na nila ang naturang kasalan.
Wala pa naman silang sinasabing eksaktong date pero baka ito na nga ‘yung sa December 22 at baka beach wedding daw ito o sa ibang bansa.
Gusto pa rin nilang very private muna ang kasalan dahil hindi naman daw nila makayang imbitahan ang lahat. Pamilya at malalapit na kaibigan lang daw ang kasama lalo na’t mahigpit ang security niyan dahil isa sa groom’s man si Pres. Noynoy Aquino.
Ang isa pang aligaga rin pala sa pag-asikaso sa kanilang kasal ay mismong si Michelle Van Eimeren, dahil wedding coordinator ito sa Australia at siya rin daw ang magpu-provide ng mga bulaklak. Isa sa mga anak nila ay mag-aabay kaya maganda ang samahan nilang lahat.
Kuwento pa nga ni Regine, talagang gusto raw ni Michelle na ilabas ang wedding pictures niya nu’ng nagpakasal sila ito kay Mark Murrow sa Australia para maipakita sa lahat na puwede na ring magpakasal si Ogie.
Ito na nga, naayos na ang annulment kaya malaki ang pasasalamat ni Ogie sa Diyos dahil pinagbigyan ang kanilang dasal.
Pagkatapos ng kasal ay napagkasunduan na rin daw nina Ogie at Regine na magpapahinga muna ang huli at lie low muna sa trabaho dahil ang next target nila siyempre ay ang magkaroon ng baby.
Nagpatingin naman daw si Regine sa doktor at puwede pa naman daw siya. Kaya sana, patuloy pa raw sa pagdarasal na mabiyayaan sila ng supling bilang bunga ng kanilang pagmamahalan.
Abangan n’yo na lang ang exclusive interview namin kina Ogie at Regine sa Startalk. Doon ikukuwento ni Ogie kung ano ang mga awiting ginawa niya na gagamitin sa kanilang kasal. Ang gusto kasi ng songwriter, pawang original songs ang gagamiting awitin sa kanilang kasal.
Bongga ito! Mala-Diva siguro ang kasalang ito na musical ang dating.
Mga Mata ni Lolita
by Lolit Solis
