HANGGANG NGAYON, PINAGTATAGPI-TAGPI pa rin namin ang mga senaryo kung saan humuhugot ng lakas ng loob ang isang batang aktres para dalhin niya sa linya ng kanyang trabaho ang isang bisyong siguradong maglalagay ng tuldok sa mabunga pa naman sana niyang career.
Kalat na kalat na sa buong bakuran ng network na pinagtatrabahuhan niya ang pagbabaon ng batang aktres na ito ng marijuana habang nagte-taping siya.
At hindi niya ‘yun itinatago, parang ipinagmamagaling pa niya. Nagsisindi siya ng damo sa mismong harapan ng kanyang mga katrabaho. Pero du’n siya nagkamali, seryoso sa trabaho ang mga kasamahan niya, “Puwede ba akong magsindi rito?”
Umuo naman ang tinanong na young actress sa pag-aakala na sigarilyo lang ang kanyang sisindihan. Pero maya-maya, umamoy na sa kuwarto ang damo, natensiyon ang young actress na gumagamit ng dressing room, “Get out of my room!” lang ang naging reaksiyon nito.
Kung sa kanyang taping, umaalagwa pa rin ang kanyang bisyo ng pagdadamo, paano pa sa kanyang tinitirhan? ‘Di parang nagyoyosi lang ang batang aktres na ito sa pagbibisyo?
Nakapanghihinayang siya. Bukod sa maganda na ang young actress na ito, nakaaarte pa nang tama. Ang gaganda pa naman ng break na ibinibigay sa kanya ng network na kinabibilangan niya.
Ewan lang kung ganu’ng pagkakataon pa rin ang ibigay sa kanya ng istasyon ngayong laganap na ang kuwento ng pagbibisyo niya sa linya ng kanyang trabaho.
‘Yun siguro ang dahilan kung bakit sinasabi ng mga nakakakita sa kanya na sumpungin-topakin ang batang aktres. Baka naba-bad trip siya.
by Cristy Fermin
